కోనేర్లకు పూర్వ వైభవం

న్యూఢిల్లీ, సెప్టెంబర్ 28: ఆంధ్రప్రదేశ్‌లో పాత బావులు, కోనేర్లను శుభ్రం చేసి వాటికి పూర్వ వైభవం తీసుకొస్తున్న యువతను ప్రధానమంత్రి నరేంద్ర మోదీ అభినందించారు. దేశవ్యాప్తంగా యువత చేపడుతున్న పరిశుభ్రత కార్యక్రమాలను ఆదివారం నిర్వహించిన మన్ కీ బాత్ కార్యక్రమంలో ఆయన ప్రత్యేకంగా ప్రస్తావించారు. ఆంధ్రప్రదేశ్‌లో యువత పురాతన బావులు, కోనేర్లను శుభ్రం చేస్తూ వాటిని పరిరక్షిస్తోందని కొనియాడారు. మధ్యప్రదేశ్‌లో నదులను, ముంబయిలో సముద్ర తీరాలను యువత శుభ్రం చేస్తోందని పేర్కొన్నారు. దేశంలోని వివిధ ప్రాంతాల్లో యువత చేపడుతున్న పరిశుభ్రత కార్యక్రమాలు స్ఫూర్తిదాయకమని అన్నారు. పరిశుభ్రతను జీవితంలో భాగంగా చేసుకోవాలని ప్రధాని పిలుపునిచ్చారు. పరిసరాలను శుభ్రంగా ఉంచడమే మహాత్మాగాంధీకి ఇచ్చే నిజమైన నివాళి అని పేర్కొన్నారు. ఆంధ్రప్రదేశ్‌లోని పలుచోట్ల యువత, స్వచ్ఛంద సంస్థలు కోనేర్లు, పురాతన నీటి వనరులను శుభ్రం చేస్తున్న విషయం తెలిసిందే.