దారి ఇవ్వమంటే దాడికి దిగారు!

విజయవాడ, నవంబర్ 11 : బైక్ తీసేందుకు దారి ఇవ్వాలని కోరిన యువకుడిపై ఇద్దరు వ్యక్తులు దాడికి పాల్పడిన ఘటన రామవరప్పాడు రింగ్‌ వద్ద చోటుచేసుకుంది. బాధితుడు అనేష్ కుమార్ (31) ఈ నెల 8వ తేదీ రాత్రి తన స్నేహితులను కలిసిన అనంతరం ఇంటికి వెళ్లేందుకు బైక్ తీస్తుండగా, అడ్డుగా ఉన్న ఇద్దరిని పక్కకు జరగాలని కోరాడు. దీంతో ఆగ్రహానికి గురైన వారు అనేష్ కుమార్‌ను అసభ్య పదజాలంతో దూషిస్తూ విచక్షణారహితంగా కొట్టినట్లు బాధితుడు ఆరోపించాడు. ఈ దాడిలో అతని కంటి పైన, ఛాతీ, చేతులపై గాయాలయ్యాయి. గాయపడిన అనేష్ కుమార్ ఆసుపత్రిలో చికిత్స పొందుతూ గుణదల పోలీసులకు ఫిర్యాదు చేశాడు. ఘటనపై పోలీసులు విచారణ జరిపి బాధ్యులపై చర్యలు తీసుకోవాలని బాధితుడు కోరాడు.