ప్లాస్టిక్‌కు దూరంగా.. పరిశుభ్రతకు చేరువగా

మచిలీపట్నం, అక్టోబర్‌ 2: పరిసరాల పరిశుభ్రతతోపాటు ప్లాస్టిక్‌ వినియోగాన్ని తగ్గించేందుకు ప్రతి ఒక్కరూ బాధ్యతగా కృషి చేయాలని కృష్ణా జిల్లా కలెక్టర్‌ డీకే బాలాజీ పిలుపునిచ్చారు. గాంధీ జయంతిని పురస్కరించుకుని మచిలీపట్నంలో నిర్వహించిన కార్యక్రమంలో మహాత్మా గాంధీ విగ్రహానికి పూలమాల వేసి ఘనంగా నివాళులర్పించారు. అనంతరం నిర్వహించిన స్వచ్ఛ ఆంధ్ర అవార్డులు–2026 జిల్లా స్థాయి ప్రదానోత్సవంలో కలెక్టర్‌ పాల్గొని విజేతలకు అవార్డులను అందజేశారు. ఈ సందర్భంగా ఆయన మాట్లాడుతూ ప్లాస్టిక్‌ వల్ల పర్యావరణానికి తీవ్ర నష్టం కలుగుతోందని, ప్రజల్లో ప్లాస్టిక్‌ వినియోగంపై మరింత అవగాహన కల్పించాల్సిన అవసరం ఉందన్నారు. కార్యక్రమంలో ప్లాస్టిక్‌ సీసాలకు బదులుగా గాజు నీటి సీసాలను అందుబాటులో ఉంచారు. అల్పాహారం పంపిణీకి కూడా ప్లాస్టిక్‌ వస్తువుల స్థానంలో పునర్వినియోగ ప్లేట్లను వినియోగించారు. ప్లాస్టిక్‌ రహిత వాతావరణంపై కేవలం సందేశాలు ఇవ్వడమే కాకుండా నిర్వాహకులు ఆచరణలో చూపించారు. రోజువారీ జీవితంలో ప్లాస్టిక్‌ వినియోగాన్ని సాధ్యమైనంత వరకు తగ్గించాలని కలెక్టర్‌ సూచించారు. ప్లాస్టిక్‌ను నివారించేందుకు ప్రతి ఒక్కరూ తమ వంతు ప్రయత్నం చేయాలని, ఇది సమాజంలోని అందరి బాధ్యతని పేర్కొన్నారు. గాంధీజీ ఆశయాలకు అనుగుణంగా పరిశుభ్రత, పర్యావరణ పరిరక్షణ కార్యక్రమాల్లో ప్రజల భాగస్వామ్యం మరింత పెరగాలని ఆకాంక్షించారు.