అవినీతి శక్తులకు ఓటుతో బుద్ధి చెప్పాలి

విజయవాడ, అక్టోబరు 5: రాబోయే నగరపాలక సంస్థ ఎన్నికల్లో కూటమి నేతల అండతో పోటీకి సిద్ధమవుతున్న మద్యం వ్యాపారులు, అవినీతి బ్రోకర్లు, భూకబ్జాకోరులను ప్రజలు ఓ కంట కనిపెట్టి, ఓటుతో బుద్ధి చెప్పాలని సీపీఎం రాష్ట్ర కార్యదర్శివర్గ సభ్యుడు సీహెచ్‌ బాబూరావు పిలుపునిచ్చారు. పాలక నేతలు బాగుపడ్డారు తప్ప విజయవాడ నగరం అభివృద్ధి చెందలేదని విమర్శించారు. సీపీఎం సెంట్రల్‌ సిటీ కమిటీ ఆధ్వర్యంలో చేపట్టిన ప్రజాపోరు యాత్ర రెండోరోజు కండ్రిక కాలనీ, ప్రజాశక్తినగర్‌, రాధానగర్‌, రాజీవ్‌నగర్‌, వాంబే కాలనీ ప్రాంతాల్లో సాగింది. స్థానికులతో మాట్లాడిన నేతలు వారి సమస్యలను అడిగి తెలుసుకున్నారు. నిర్వహణ లేని పార్కులు, అధ్వాన పారిశుధ్యం, స్తంభించిన డ్రైనేజీ వ్యవస్థ, దెబ్బతిన్న ఇళ్ల స్లాబులను పరిశీలించారు. నిత్యావసరాల ధరలు, విద్యుత్‌ బిల్లులు, మంచినీటి సరఫరాలో ఆటంకాలు, అందని పట్టాలు, నిలిచిపోయిన గృహ నిర్మాణ బిల్లులు, రేషన్‌ దుకాణాల్లో సరుకుల కొరత, మహిళలకు నెలకు రూ.1,500 హామీ అమలుకాకపోవడం వంటి సమస్యలను ప్రజలు తమ దృష్టికి తీసుకొచ్చినట్లు బాబూరావు తెలిపారు. ఇళ్ల స్థలాలు, గృహ నిర్మాణంపై ప్రభుత్వం కాకి లెక్కలతో ప్రజలను మభ్యపెడుతోందని ఆరోపించారు. బుడమేరు వరదల సమయంలో సీపీఎం 15 కేంద్రాల ద్వారా పది రోజులపాటు 1.80 లక్షల మందికి భోజనాలు అందించి బాధితులకు అండగా నిలిచిందన్నారు. ముంపు బాధితుల్లో అనేక మందికి ఇప్పటికీ పూర్తిస్థాయి సాయం అందలేదని ఆరోపించారు. నగరాన్ని కాపాడుకునేందుకు ప్రజలు సీపీఎం ఉద్యమాలకు అండగా నిలవాలని కోరారు. యాత్రలో సీపీఎం నాయకులు బి. రమణరావు, కె. దుర్గారావు, టి. ప్రవీణ్‌, కె. సరోజ, సీహెచ్‌ శ్రీనివాస్‌, ఝాన్సీ, పీర్‌సాహెబ్‌, వెంకటరెడ్డి తదితరులు పాల్గొన్నారు.