పెడనలో నాలుగు మండలాలు కరువు ప్రాంతాలుగా ప్రకటన

పెడన, అక్టోబర్ 2: పెడన నియోజకవర్గంలోని నాలుగు మండలాలను కరువు ప్రాంతాలుగా ప్రకటిస్తూ రాష్ట్ర ప్రభుత్వం చారిత్రాత్మక నిర్ణయం తీసుకుందని తెలుగుదేశం పార్టీ నాయకులు తెలిపారు. ఎల్‌నినో ప్రభావంతో పంటలు దెబ్బతిని రైతులు తీవ్రంగా నష్టపోయిన నేపథ్యంలో ఎమ్మెల్యే కాగిత కృష్ణప్రసాద్ చేసిన విజ్ఞప్తికి ప్రభుత్వం సానుకూలంగా స్పందించినట్లు పేర్కొన్నారు. ఇటీవల పెడన నియోజకవర్గ తెలుగుదేశం పార్టీ కార్యాలయంలో నిర్వహించిన ముఖ్య నాయకుల సమావేశంలో నాలుగు మండలాలను కరువు ప్రాంతాలుగా ప్రకటించాలని తీర్మానం చేశారు. రైతుల సమస్యలు, పంట నష్టం వివరాలతో కూడిన తీర్మానాన్ని ఎమ్మెల్యే కాగిత కృష్ణప్రసాద్ ముఖ్యమంత్రి నారా చంద్రబాబు నాయుడు దృష్టికి తీసుకెళ్లారు. రైతుల ప్రయోజనాలను దృష్టిలో పెట్టుకొని నాలుగు మండలాలను కరువు ప్రాంతాలుగా గుర్తించాలని ఎమ్మెల్యే ప్రభుత్వానికి విజ్ఞప్తి చేశారు. దీనిపై స్పందించిన ముఖ్యమంత్రి నాలుగు మండలాలను కరువు మండలాలుగా ప్రకటించినట్లు పార్టీ నాయకులు వెల్లడించారు. గత మల్లేశ్వరం, ప్రస్తుత పెడన నియోజకవర్గ చరిత్రలో ఒకేసారి నాలుగు మండలాలను కరువు ప్రాంతాలుగా ప్రకటించడం ఇదే తొలిసారని తెలిపారు. రైతుల సమస్యలను ప్రభుత్వం దృష్టికి తీసుకెళ్లి వారికి అండగా నిలిచిన ఎమ్మెల్యే కాగిత కృష్ణప్రసాద్‌కు నియోజకవర్గ రైతులు కృతజ్ఞతలు తెలిపారు.