ఉత్సవ సందడి.. ఆటోలతో ప్రచార జోరు

విజయవాడ, అక్టోబర్‌ 8: విజయవాడ ఉత్సవ్‌–2.0 కార్యక్రమాలను ప్రజలకు చేరవేసేందుకు ప్రచార ఆటోలను గురువారం ప్రారంభించారు. సింగ్‌నగర్‌లోని సెంట్రల్‌ నియోజకవర్గ శాసనసభ్యుల కార్యాలయం వద్ద టీడీపీ యువ నాయకుడు బొండా సిద్ధార్థ, భవన నిర్మాణ కార్మికుల సలహా కమిటీ చైర్మన్‌, తెలుగు నాడు కార్మిక సంఘం రాష్ట్ర అధ్యక్షుడు గొట్టుముక్కల రఘురామరాజు కలిసి ఆటోలను ప్రారంభించి, ఉత్సవ పోస్టర్లను అంటించారు. ఈ సందర్భంగా బొండా సిద్ధార్థ మాట్లాడుతూ విజయవాడ ఉత్సవ్‌–2.0ను నగర ప్రజలందరి పండుగగా నిర్వహించేందుకు విస్తృత ఏర్పాట్లు చేస్తున్నట్లు తెలిపారు.

రోజువారీ కార్యక్రమాలు, సాంస్కృతిక ప్రదర్శనలు, ప్రత్యేక కార్యక్రమాల వివరాలను ప్రచార ఆటోల ద్వారా ప్రజలకు తెలియజేస్తామన్నారు. మాకినేని బసవపున్నయ్య స్టేడియంలో నిర్వహించే ప్రధాన కార్యక్రమాల సమాచారాన్ని ప్రతి డివిజన్‌కు చేరవేస్తామని చెప్పారు. నగరంలోని ప్రతి కుటుంబాన్ని ఉత్సవాల్లో భాగస్వామ్యం చేయడమే లక్ష్యమన్నారు. విజయవాడ చారిత్రక, సాంస్కృతిక వైభవాన్ని చాటిచెప్పే ఈ ఉత్సవాల్లో యువత, మహిళలు, విద్యార్థులు, వ్యాపారులు, అన్ని వర్గాల ప్రజలు పెద్ద సంఖ్యలో పాల్గొనాలని కోరారు. కార్యక్రమంలో టీడీపీ నాయకులు, కార్యకర్తలు, యువత పాల్గొన్నారు.