నగ్న చిత్రాలతో మాజీ ప్రియుడి బ్లాక్‌మెయిల్‌

విజయవాడ, అక్టోబరు 5: వివాహిత యువతికి సంబంధించిన వ్యక్తిగత చిత్రాలు, వీడియోలను సామాజిక మాధ్యమాల్లో పెట్టి బెదిరించినట్లు ఆరోపణలు ఎదుర్కొంటున్న మాజీ ప్రియుడిపై ఆమె కుటుంబ సభ్యులు దాడి చేసిన ఘటన విజయవాడలో చోటుచేసుకుంది. పోలీసుల ప్రాథమిక సమాచారం ప్రకారం.. యువతితో గతంలో సన్నిహితంగా ఉన్న సమయంలో తీసుకున్న అభ్యంతరకర చిత్రాలు, వీడియోలను అడ్డుపెట్టుకొని నిందితుడు నెల రోజులుగా తనను కలవాలంటూ ఆమెను వేధిస్తున్నట్లు తెలిసింది. యువతి అంగీకరించకపోవడంతో ఆ చిత్రాలు, వీడియోలను సామాజిక మాధ్యమాల్లో పెట్టడంతోపాటు ఆమె భర్తకు కూడా పంపినట్లు ఆరోపణలు ఉన్నాయి. విషయం బయటకు రావడంతో భార్యాభర్తల మధ్య విభేదాలు తలెత్తి, భర్త ఆమెను వదిలేసినట్లు సమాచారం. దీంతో బాధిత యువతి జరిగిన విషయాన్ని కుటుంబ సభ్యులకు తెలిపింది. ఈ క్రమంలో పథకం ప్రకారం మాజీ ప్రియుడిని విజయవాడకు రప్పించిన యువతి కుటుంబ సభ్యులు బందరు రోడ్డులోని పీవీపీ మాల్‌ సమీపంలో అతనిపై దాడి చేశారు. ఘర్షణను గమనించిన స్థానికులు పోలీసులకు సమాచారం అందించారు. వెంటనే అక్కడకు చేరుకున్న పోలీసులు యువకుడిని అదుపులోకి తీసుకొని పోలీస్‌స్టేషన్‌కు తరలించారు. వ్యక్తిగత దృశ్యాల ప్రచారం, బెదిరింపులు, దాడి ఘటనలపై ఇరువర్గాల వాదనలను నమోదు చేసి పోలీసులు విచారణ చేపట్టారు. బాధితుల గుర్తింపు బయటకు రాకుండా వివరాలను గోప్యంగా ఉంచారు.