సేవా సారథులకు సత్యకుమార్‌ సత్కారం

ధర్మవరం, సెప్టెంబరు 26: సేవా సంకల్ప అభియాన్‌లో భాగంగా ధర్మవరంలో నిర్వహించిన ‘అంగన్‌ కా ఉత్సవ్‌’ కార్యక్రమంలో రాష్ట్ర వైద్య, ఆరోగ్య, కుటుంబ సంక్షేమ, వైద్యవిద్య శాఖ మంత్రి, ధర్మవరం ఎమ్మెల్యే సత్యకుమార్‌ యాదవ్‌ పాల్గొన్నారు. అంగన్వాడీ కార్యకర్తలు, సహాయకులు, ఆశా కార్యకర్తలను శాలువాలతో సత్కరించి వారి నిస్వార్థ సేవలను అభినందించారు. దేశవ్యాప్తంగా 14 లక్షల అంగన్వాడీ కేంద్రాల ద్వారా సుమారు తొమ్మిది కోట్ల మంది లబ్ధిదారులకు సేవలు అందుతున్నాయని మంత్రి తెలిపారు. పౌష్టికాహార పంపిణీకే పరిమితం

కాకుండా పిల్లల ప్రాథమిక విద్య, ఆరోగ్యం, పోషణ, ఎదుగుదలతోపాటు తల్లిదండ్రులకు అవగాహన కల్పించడంలో అంగన్వాడీ కేంద్రాలు కీలకపాత్ర పోషిస్తున్నాయని పేర్కొన్నారు. దేశవ్యాప్తంగా సుమారు లక్షన్నర కేంద్రాలను సక్షం అంగన్వాడీలుగా అభివృద్ధి చేస్తున్నట్లు చెప్పారు. అంగన్వాడీ సేవలను మరింత బలోపేతం చేసేందుకు సుమారు రూ.22 వేల కోట్ల బడ్జెట్‌ను కేటాయించినట్లు వివరించారు. కార్యకర్తల సేవలను సమాజానికి పరిచయం చేసి వారికి సముచిత గౌరవం కల్పించడమే ఈ కార్యక్రమ లక్ష్యమని మంత్రి సత్యకుమార్‌ యాదవ్‌ తెలిపారు.