దసరా ఏర్పాట్లపై అధికారుల క్షేత్రస్థాయి పరిశీలన

విజయవాడ, అక్టోబర్‌ 3: దసరా మహోత్సవాలకు వచ్చే భక్తులకు ఎలాంటి అసౌకర్యం కలగకుండా పటిష్ఠ ఏర్పాట్లు చేస్తున్నట్లు ఎన్టీఆర్‌ జిల్లా కలెక్టర్‌ డాక్టర్‌ జి.లక్ష్మీశ, నగర పోలీస్‌ కమిషనర్‌ ఎస్‌.వి.రాజశేఖరబాబు, విజయవాడ నగరపాలక సంస్థ కమిషనర్‌ ధ్యానచంద్ర తెలిపారు. దుర్గామల్లేశ్వరస్వామి వార్ల దసరా మహోత్సవాల నేపథ్యంలో శనివారం వారు క్షేత్రస్థాయిలో పర్యటించి ఏర్పాట్లను పరిశీలించారు. భక్తుల రాకపోకలకు ఏర్పాటు చేస్తున్న క్యూలైన్లు, ప్రవేశ మార్గాలు, భద్రతా చర్యలు, తాగునీరు, పారిశుద్ధ్యం తదితర సదుపాయాలను పరిశీలించి అధికారులకు సూచనలు చేశారు. భక్తుల సౌకర్యం, భద్రత కోసం కృత్రిమ మేధ ఆధారిత ప్రదర్శన బోర్డులు, చిన్నారులు తప్పిపోకుండా గుర్తింపు పట్టీలు, బూమ్‌ బారియర్లు ఏర్పాటు చేస్తున్నట్లు వెల్లడించారు. నిరంతర పర్యవేక్షణ కోసం కమాండ్‌ కంట్రోల్‌ కేంద్రాన్ని అందుబాటులోకి తీసుకొస్తున్నట్లు తెలిపారు. అన్ని శాఖల అధికారులు సమన్వయంతో పనిచేసి దసరా ఉత్సవాలను విజయవంతం చేయాలని ఆదేశించారు.