విజయవాడ హరిత బెర్మ్‌పార్క్‌కు రాష్ట్రస్థాయి అవార్డు

విజయవాడ, సెప్టెంబర్ 28: రాష్ట్ర వార్షిక పర్యాటక ప్రతిభా పురస్కారాలు–2026లో విజయవాడ హరిత బెర్మ్‌పార్క్ ఉత్తమ హరిత హోటల్ అవార్డును కైవసం చేసుకుంది. రాజమహేంద్రవరం వేదికగా నిర్వహించిన కార్యక్రమంలో ఈ అవార్డును ప్రదానం చేశారు. 2024లో కృష్ణానదికి సంభవించిన భారీ వరదల కారణంగా బెర్మ్‌పార్క్ యూనిట్ తీవ్రంగా దెబ్బతింది. అయినప్పటికీ అధికారులు, సిబ్బంది అంకితభావంతో పనిచేసి పార్కును పునరుద్ధరించారు. పర్యాటకులకు మెరుగైన వసతులు కల్పించడంతోపాటు హరిత వాతావరణాన్ని పరిరక్షించేందుకు చేపట్టిన చర్యలకు గుర్తింపుగా ఈ పురస్కారం లభించింది. హరిత బెర్మ్‌పార్క్ మేనేజర్ శ్రీనివాస్, పర్యాటక శాఖ డివిజనల్ మేనేజర్ కృష్ణ చైతన్య ఈ అవార్డును అందుకున్నారు. రాష్ట్రస్థాయి గుర్తింపు లభించడం పట్ల అధికారులు, సిబ్బంది ఆనందం వ్యక్తం చేశారు.