రేషన్‌ పంపిణీలో అక్రమాలను ఉపేక్షించం

విజయవాడ, అక్టోబర్‌ 9: పేదలకు అందాల్సిన రేషన్‌ సరుకుల పంపిణీలో అక్రమాలకు పాల్పడితే ఉపేక్షించేది లేదని ప్రభుత్వ విప్‌, విజయవాడ సెంట్రల్‌ ఎమ్మెల్యే బొండా ఉమామహేశ్వరరావు హెచ్చరించారు. శుక్రవారం సింగ్‌నగర్‌ జెండా చెట్టు సమీపంలోని పాత మసీదు పక్కన ఉన్న 147వ చౌకధరల దుకాణాన్ని ఆయన ఆకస్మికంగా తనిఖీ చేశారు. రేషన్‌ పంపిణీలో ఎదురవుతున్న సమస్యపై ఓ మహిళ ఎమ్మెల్యేను ఆశ్రయించడంతో ఆయన వెంటనే స్పందించారు. దుకాణానికి వెళ్లి సరుకుల పంపిణీ తీరును పరిశీలించి అధికారులను వివరాలు అడిగి తెలుసుకున్నారు.ప్రభుత్వం అమలు చేస్తున్న రేషన్‌ పోర్టబిలిటీ విధానాన్ని ఎందుకు సక్రమంగా అమలు చేయడం లేదని అధికారులను ప్రశ్నించారు. కార్డుదారులు తమకు అందుబాటులో ఉన్న ఏ చౌకధరల దుకాణంలోనైనా నిబంధనల ప్రకారం సరుకులు పొందేలా చర్యలు తీసుకోవాలని ఆదేశించారు. ఈ వ్యవహారంపై జిల్లా సరఫరాల అధికారి, సహాయ సరఫరాల అధికారి సమగ్రంగా విచారించి సమస్యను పరిష్కరించాలని సూచించారు.రేషన్‌ కోసం వచ్చే ప్రజలను అనవసరంగా తిప్పించుకోవద్దని, కార్డుదారులతో డీలర్లు మర్యాదగా వ్యవహరించాలని స్పష్టం చేశారు. రేషన్‌ పంపిణీలో అవకతవకలు జరిగినట్లు విచారణలో తేలితే బాధ్యులపై చట్టప్రకారం కఠిన చర్యలు తీసుకోవాలని అధికారులను ఆదేశించారు. ప్రతి అర్హుడికీ ప్రభుత్వ సంక్షేమ ప్రయోజనాలు సకాలంలో అందేలా పౌరసరఫరాల శాఖ అధికారులు నిరంతరం పర్యవేక్షించాలని బొండా ఉమామహేశ్వరరావు సూచించారు.