పదేళ్లుగా పేదల ఇళ్లకు తాళాలు!

విజయవాడ, అక్టోబర్ 9: పేదలకు గూడు కల్పించాలనే లక్ష్యంతో కోట్లాది రూపాయల ప్రజాధనాన్ని వెచ్చించి నిర్మించిన గృహాలు పదేళ్లుగా నిరుపయోగంగా ఉండటం అధికారుల నిర్లక్ష్యానికి నిదర్శనమని సీపీఐ నగర కార్యదర్శి జి.కోటేశ్వరరావు విమర్శించారు. విద్యాధరపురం కబేళా సెంటర్ వద్ద జవహర్‌లాల్ నెహ్రూ జాతీయ పట్టణ పునరుద్ధరణ మిషన్ నిధులతో నిర్మించిన ఇళ్లను అర్హులైన లబ్ధిదారులకు వెంటనే కేటాయించాలని డిమాండ్ చేశారు. శుక్రవారం సీపీఐ నాయకుల బృందంతో కలిసి కబేళా సెంటర్‌లోని గృహ సముదాయాలను పరిశీలించారు.ఈ సందర్భంగా కోటేశ్వరరావు మాట్లాడుతూ గతంలో కబేళా సెంటర్ నుంచి సితార సెంటర్ వరకు, నైనవరం రైల్వేగేటు పరిసరాల్లో రోడ్ల విస్తరణ కారణంగా నిర్వాసితులైన కుటుంబాలకు తాత్కాలిక నివాసాలు ఏర్పాటు చేసిన విషయాన్ని గుర్తుచేశారు. అనంతరం సీపీఐ ఆధ్వర్యంలో చేపట్టిన పోరాటాల ఫలితంగా వారికి జక్కంపూడి కాలనీలో శాశ్వత నివాసాలు కేటాయించారని తెలిపారు.నగరంలోని నిరుపేదలకు శాశ్వత నివాసాలు కల్పించేందుకు జేఎన్‌ఎన్‌యూఆర్‌ఎం నిధులతో కబేళా సెంటర్‌లో ఒక్కో భవనంలో 32 ఇళ్ల చొప్పున 12 భవనాల్లో మొత్తం 384 గృహాలను నిర్మించారని వివరించారు. నిర్మాణాలు పూర్తయి దాదాపు పదేళ్లు గడిచినా ఇప్పటివరకు కేవలం 11 ఇళ్లను మాత్రమే లబ్ధిదారులకు కేటాయించారని ఆరోపించారు. మరో నాలుగు ఇళ్లను నగరపాలక సంస్థ

పారిశుద్ధ్య కార్యాలయాలుగా, కొన్ని గృహాలను సచివాలయాలుగా వినియోగిస్తున్నారని తెలిపారు.మిగిలిన దాదాపు 370 ఇళ్లు నిరుపయోగంగా ఉండటంతో శిథిలావస్థకు చేరుతున్నాయని ఆవేదన వ్యక్తం చేశారు. నిర్వహణ లేకపోవడంతో గృహ సముదాయాలు అసాంఘిక కార్యకలాపాలకు అడ్డాలుగా మారుతున్నాయని ఆరోపించారు. ఒకవైపు నగరంలో వేలాది నిరుపేద కుటుంబాలు అద్దె ఇళ్లలో ఇబ్బందులు పడుతుంటే మరోవైపు ప్రభుత్వ నిధులతో నిర్మించిన గృహాలు ఖాళీగా ఉండటం విచారకరమన్నారు.ప్రభుత్వాలు మారుతున్నా పేదలకు ఇళ్ల కేటాయింపులో నిర్లక్ష్యం కొనసాగుతోందని విమర్శించారు. నగరంలో ఇళ్లు లేని అర్హులైన నిరుపేదలను గుర్తించేందుకు అవసరమైన సర్వే ప్రక్రియను పూర్తిస్థాయిలో చేపట్టకపోవడమే ఈ పరిస్థితికి కారణమని ఆరోపించారు. ఇప్పటికైనా నగరపాలక సంస్థ అధికారులు స్పందించి సమగ్ర సర్వే నిర్వహించి, అర్హులైన లబ్ధిదారులకు ఇళ్లను కేటాయించాలని డిమాండ్ చేశారు. లేనిపక్షంలో పేదల పక్షాన ఆందోళనలు చేపడతామని హెచ్చరించారు.ఈ కార్యక్రమంలో సీపీఐ నగర కార్యదర్శివర్గ సభ్యురాలు పంచదార్ల దుర్గాంబ, డివిజన్ కార్యదర్శులు కంచర్ల నాగేశ్వరరావు, టి.పూర్ణయ్య, సహాయ కార్యదర్శులు యెర్రసాని జోసఫ్, అంజూరి సూరిబాబు, నాయకులు నడకుదిటి వెంకటేశ్వరరావు, కోటా రాంబాబు, భగవాన్, పడాల తవుడమ్మ, నాగేశ్వరరావు, నక్కా నాగేశ్వరరావు, రత్తమ్మ తదితరులు పాల్గొన్నారు.