సీఐ అలీ ఆకస్మిక మృతి పోలీసుశాఖకు తీరని లోటు

విజయవాడ, సెప్టెంబర్‌ 28: నున్న పోలీస్‌స్టేషన్‌ సీఐ అలీ ఆకస్మిక మృతి పోలీసుశాఖతోపాటు సెంట్రల్‌ నియోజకవర్గ ప్రజలకు తీరని లోటని ప్రభుత్వ విప్‌, ఎమ్మెల్యే బొండా ఉమామహేశ్వరరావు పేర్కొన్నారు. ధర్నాచౌక్‌లో ఆదివారం బందోబస్తు విధులు నిర్వహిస్తూ గుండెపోటుకు గురై మృతి చెందిన సీఐ అలీకి సోమవారం నున్న పోలీస్‌స్టేషన్‌లో ఆయన నివాళులర్పించారు. ఈ సందర్భంగా బొండా ఉమా మాట్లాడుతూ విధి నిర్వహణలో అంకితభావంతో పనిచేసిన పోలీసు అధికారిని కోల్పోవడం అత్యంత బాధాకరమన్నారు. శాంతిభద్రతల పరిరక్షణలో, ప్రజలకు ప్రశాంత వాతావరణం కల్పించడంలో అలీ ఎంతో కష్టపడి పనిచేశారని గుర్తుచేశారు. ఎలాంటి పరిస్థితులు ఎదురైనా బాధ్యతాయుతంగా వ్యవహరిస్తూ ప్రజలకు, పోలీసుశాఖకు విశేష సేవలు

అందించారని కొనియాడారు. సెంట్రల్‌ నియోజకవర్గ పరిధిలోని వివిధ ప్రాంతాల్లో పనిచేసిన సమయంలో ప్రజలతో మమేకమై వారి మన్ననలు పొందారని తెలిపారు. ఆయన కుటుంబానికి ప్రభుత్వం నుంచి అవసరమైన సహాయం అందేలా ఉన్నతాధికారుల దృష్టికి తీసుకెళ్తానని హామీ ఇచ్చారు. కుటుంబానికి అన్ని విధాలుగా అండగా నిలుస్తామని భరోసా ఇచ్చారు. అలీ ఆత్మకు శాంతి చేకూరాలని, ఆయన కుటుంబ సభ్యులకు భగవంతుడు ధైర్యం ప్రసాదించాలని బొండా ఉమా ప్రార్థించారు. కార్యక్రమంలో నున్న పోలీస్‌స్టేషన్‌ సిబ్బందితోపాటు తెదేపా నాయకులు నవనీతం సాంబశివరావు, పైడి తులసి, లబ్బా వైకుంఠం, కోలా శ్రీను, మోత్కూరి కాసిం, పైడి శ్రీను, బుదాల సురేష్‌, జలకం రాజా, దాసరి కనకరావు, గౌసియా, విజయలక్ష్మి తదితరులు పాల్గొన్నారు.