క్షేత్రస్థాయి పోరాటాలకు సిద్ధం కావాలి

విజయవాడ, అక్టోబర్‌ 3: వైఎస్సార్‌ కాంగ్రెస్‌ పార్టీని క్షేత్రస్థాయిలో మరింత బలోపేతం చేయడంతోపాటు ప్రజలు ఎదుర్కొంటున్న సమస్యలపై ఉద్యమాలకు సిద్ధం కావాలని ఆ పార్టీ నాయకులు పిలుపునిచ్చారు. విజయవాడ నగర ముఖ్య నాయకుల విస్తృతస్థాయి సమావేశం శనివారం వైఎస్సార్‌సీపీ ఎన్టీఆర్‌ జిల్లా అధ్యక్షుడు దేవినేని అవినాష్‌ అధ్యక్షతన నిర్వహించారు. రామవరప్పాడు రింగ్‌ సర్వీస్‌ రోడ్డులోని కరెన్సీనగర్‌ ఎం కన్వెన్షన్‌ హాలులో జరిగిన ఈ సమావేశంలో పార్టీ భవిష్యత్‌ కార్యాచరణ, సంస్థాగత బలోపేతం, నగరంలోని ప్రజా సమస్యలపై చేపట్టాల్సిన పోరాటాల గురించి విస్తృతంగా చర్చించారు.

నియోజకవర్గాలు, డివిజన్లవారీగా పార్టీ శ్రేణులను సమన్వయం చేసుకుంటూ ప్రజల మధ్య ఉండాలని నాయకులకు దిశానిర్దేశం చేశారు. సమావేశానికి ముఖ్య అతిథులుగా ఎన్టీఆర్‌, కృష్ణా, ప్రకాశం జిల్లాల ప్రాంతీయ సమన్వయకర్త, ఎంపీ ఆళ్ల అయోధ్య రామిరెడ్డి, విజయవాడ పార్లమెంట్‌ పరిశీలకుడు మోదుగుల వేణుగోపాల్‌రెడ్డి హాజరయ్యారు. మాజీ మంత్రి, విజయవాడ పశ్చిమ నియోజకవర్గ సమన్వయకర్త వెలంపల్లి శ్రీనివాసరావుతోపాటు నగరానికి చెందిన పలువురు ముఖ్య నాయకులు పాల్గొన్నారు. పార్టీ శ్రేణుల్లో ఐక్యతను పెంపొందిస్తూ ప్రజా సమస్యల పరిష్కారమే లక్ష్యంగా సమష్టిగా ముందుకు సాగాలని సమావేశంలో నిర్ణయించారు.