సాంకేతిక పరిజ్ఞానంతో రూ.41 వేల విలువైన సెల్‌ఫోన్ల రికవరీ!

పోగొట్టుకున్న సెల్‌ఫోన్లను సాంకేతిక పరిజ్ఞానం సాయంతో గుర్తించి బాధితులకు తిరిగి అప్పగించడంలో బొల్లాపల్లి పోలీసులు విజయవంతమయ్యారు. కేంద్ర ప్రభుత్వ సీఈఐఆర్ పోర్టల్ సహాయంతో రూ.41 వేల విలువైన రెండు మొబైల్ ఫోన్లను గుర్తించి స్వాధీనం చేసుకున్నారు. వీటిలో ఒక ఫోన్ వినుకొండలో లభించగా, మరొకటి ఉత్తరప్రదేశ్‌లో గుర్తించడం విశేషం. పల్నాడు జిల్లా సంగినీడిపాలెం గ్రామానికి చెందిన గొర్రె ఆంజనేయులు (32) ముగాచింతలపాలెంలో రూ.18 వేల విలువైన రెడ్‌మీ ఫోన్ పోగొట్టుకున్నారు. సీఈఐఆర్ పోర్టల్‌లో ఫిర్యాదు చేయడంతో పోలీసులు సాంకేతిక ఆధారాలతో వినుకొండలో ఫోన్‌ను గుర్తించి రికవరీ చేశారు. అలాగే బొల్లాపల్లికి చెందిన షేక్ సైదు హుస్సేన్ (28) పోగొట్టుకున్న రూ.23 వేల విలువైన రియల్‌మీ ఫోన్‌ను ఉత్తరప్రదేశ్‌లో గుర్తించి స్వాధీనం చేసుకున్నారు. జిల్లా పోలీసు అధికారి ఆదేశాల మేరకు బొల్లాపల్లి ఎస్‌ఐ ఆధ్వర్యంలో ఈ ఫోన్లను రికవరీ చేసి బాధితులకు అప్పగించారు. తమ ఫోన్లు తిరిగి లభించడంతో బాధితులు పోలీసులకు కృతజ్ఞతలు తెలిపారు. మొబైల్ ఫోన్లు పోగొట్టుకున్న ప్రజలు సీఈఐఆర్ పోర్టల్‌ను వినియోగించుకోవాలని, ఫోన్ల ఐఎంఈఐ నంబర్లు, కొనుగోలు బిల్లులు భద్రపరచుకోవాలని పోలీసులు సూచించారు.