కృష్ణా జలాలపై ఏపీ–తెలంగాణ పట్టు!

అమరావతి, ఆగస్టు 24: శ్రీశైలం, నాగార్జునసాగర్ జలాశయాల్లో అందుబాటులో ఉన్న నీటిని తాగునీటి అవసరాలకే వినియోగించాలని కృష్ణా నదీ యాజమాన్య బోర్డు (KRMB) త్రిసభ్య కమిటీ భేటీలో తెలుగు రాష్ట్రాలు నిర్ణయించాయి.

ఎల్‌నినో ప్రభావంతో రానున్న రోజుల్లో నీటి లభ్యతపై అనిశ్చితి నెలకొనే అవకాశమున్న నేపథ్యంలో తాగునీటి అవసరాలకు ప్రాధాన్యం ఇవ్వాలని నిర్ణయించినట్లు సమాచారం. శ్రీశైలం, నాగార్జునసాగర్ జలాశయాల్లోని నీటి నిల్వలు, రెండు రాష్ట్రాల అవసరాలు, రాబోయే నెలల్లో తాగునీటి డిమాండ్ తదితర అంశాలపై సమావేశంలో చర్చించారు.

అక్టోబర్ వరకు తమ అవసరాలకు అదనంగా 47 టీఎంసీల నీటిని కేటాయించాలని ఏపీ ఇంజనీర్ ఇన్ చీఫ్ నరసింహమూర్తి కోరారు. అయితే అందుబాటులో ఉన్న నీటిని 50:50 నిష్పత్తిలో రెండు రాష్ట్రాలకు కేటాయించాలని తెలంగాణ ఇంజనీర్ ఇన్ చీఫ్ రమేష్‌బాబు ప్రతిపాదించినట్లు సమాచారం.

పోతిరెడ్డిపాడు హెడ్ రెగ్యులేటర్ నుంచి ఆంధ్రప్రదేశ్ అధికంగా నీటిని వినియోగిస్తోందని తెలంగాణ అధికారులు అభ్యంతరం వ్యక్తం చేసినట్లు తెలుస్తోంది. రెండు రాష్ట్రాల నీటి అవసరాలు, వాటాలపై ఏకాభిప్రాయం కుదరకపోవడంతో తుది నిర్ణయం తీసుకోలేదు.

నీటి కేటాయింపుల అంశంపై మరోసారి చర్చించేందుకు KRMB త్రిసభ్య కమిటీ సమావేశాన్ని సెప్టెంబర్ 4కు వాయిదా వేసినట్లు సమాచారం. తదుపరి సమావేశంలో రెండు రాష్ట్రాల డిమాండ్లు, జలాశయాల్లో అందుబాటులో ఉన్న నీటి పరిమాణాన్ని పరిగణనలోకి తీసుకుని కేటాయింపులపై నిర్ణయం తీసుకునే అవకాశం ఉంది.