78వ డివిజన్‌లో కాంగ్రెస్ అభ్యర్థి వేముల కనకదుర్గ ఇంటింటి ప్రచారం

విజయవాడ సెంట్రల్, అక్టోబర్ 27 : విజయవాడ నగరపాలక సంస్థ ఎన్నికల నేపథ్యంలో 78వ డివిజన్ కాంగ్రెస్ పార్టీ కార్పొరేటర్ అభ్యర్థి వేముల కనకదుర్గ మంగళవారం విస్తృతంగా ఇంటింటి ఎన్నికల ప్రచారం నిర్వహించారు. సెంట్రల్ నియోజకవర్గ పరిధిలోని కేఎల్ రావు రోడ్డులో ఇంటింటికీ వెళ్లి స్థానిక ఓటర్లను కలుసుకున్నారు. రానున్న నగరపాలక సంస్థ ఎన్నికల్లో హస్తం గుర్తుకు ఓటు వేసి తనను గెలిపించాలని అభ్యర్థించారు. ఈ సందర్భంగా వేముల కనకదుర్గ మాట్లాడుతూ డివిజన్ ప్రజలు తనకు కార్పొరేటర్‌గా అవకాశం కల్పిస్తే స్థానిక సమస్యల పరిష్కారానికి ప్రాధాన్యత ఇస్తానని తెలిపారు. ముఖ్యంగా డివిజన్‌లో ప్రధాన సమస్యగా ఉన్న సైడ్ డ్రెయిన్ల సమస్యకు శాశ్వత పరిష్కారం చూపించేందుకు కృషి చేస్తానని హామీ ఇచ్చారు. మౌలిక సదుపాయాల మెరుగుదలతో పాటు డివిజన్ సమగ్ర అభివృద్ధికి కృషి చేస్తానని పేర్కొన్నారు. ప్రజలకు నిరంతరం అందుబాటులో ఉంటూ వారి సమస్యలను పరిష్కరించేందుకు పనిచేస్తానని తెలిపారు. ఈ ఎన్నికల ప్రచార కార్యక్రమంలో ఎన్‌ఎస్‌యూఐ రాష్ట్ర కోఆర్డినేటర్ వేముల శ్రీనివాస్, ఎన్టీఆర్ జిల్లా యువజన కాంగ్రెస్ అధ్యక్షుడు బత్తుల అంకమ్మరాజు, కేకేసీ రాష్ట్ర కార్యదర్శి మామిడాల రమణ, సీనియర్ కాంగ్రెస్ నాయకులు వేముల దుర్గారావు, శేఖర్ తదితరులు పాల్గొన్నారు.