వ్యాపారులకు అండగా ఉంటా!
వ్యాపారుల సమస్యల పరిష్కారానికి నిరంతరం కృషి చేస్తా... చిరు వ్యాపారుల నుంచి పెద్ద వ్యాపారుల వరకు అందరికీ భరోసా... 31వ డివిజన్ ఆత్మీయ సమావేశంలో బుద్దా వెంకన్న...

విజయవాడ, నవంబర్ 15: విజయవాడ పశ్చిమ నియోజకవర్గంలోని వ్యాపారులకు తెలుగుదేశం పార్టీ ఎల్లప్పుడూ అండగా ఉంటుందని, వారి సమస్యల పరిష్కారానికి నిరంతరం కృషి చేస్తానని పశ్చిమ నియోజకవర్గ ఇన్చార్జ్ బుద్దా వెంకన్న పేర్కొన్నారు. బ్రాహ్మణ వీధిలోని ఎస్ఆర్ కల్యాణ మండపంలో 31వ డివిజన్ కార్పొరేటర్ గడ్డం బాల వెంకట రవికుమార్ ఆధ్వర్యంలో నిర్వహించిన ఆత్మీయ సమావేశంలో ఆయన పాల్గొని మాట్లాడారు. వ్యాపారులు నగర ఆర్థికాభివృద్ధికి వెన్నెముక వంటి వారని, వేలాది కుటుంబాలకు ఉపాధి కల్పిస్తూ సమాజ అభివృద్ధిలో కీలక పాత్ర పోషిస్తున్నారని కొనియాడారు. వ్యాపారులు ఎదుర్కొంటున్న సమస్యలను తన దృష్టికి తీసుకువస్తే సంబంధిత అధికారులతో చర్చించి పరిష్కారానికి చర్యలు తీసుకునేలా కృషి చేస్తానని హామీ ఇచ్చారు. రాజకీయాలు పదవుల కోసం కాకుండా ప్రజాసేవ కోసం ఉండాలని బుద్దా వెంకన్న స్పష్టం చేశారు. చిరు వ్యాపారుల నుంచి పెద్ద వ్యాపారుల వరకు ప్రతి ఒక్కరికీ గౌరవం, భరోసా కల్పించడమే తమ లక్ష్యమన్నారు. వ్యాపార వర్గాల సహకారంతో పశ్చిమ నియోజకవర్గాన్ని అన్ని రంగాల్లో అభివృద్ధి పథంలో నడిపిస్తామని తెలిపారు. ఈ కార్యక్రమంలో కార్పొరేటర్ ఉమ్మడి చంటి, నందకిషోర్ లోయ, వక్కలగడ్డ శ్రీకాంత్, అమరా మురళి, పిల్లా సుదర్శన్తో పాటు స్థానిక వ్యాపారులు, టీడీపీ నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.

