ఐదు డివిజన్లలో బొండా రవితేజ విస్తృత ప్రచారం

విజయవాడ, అక్టోబర్ 30: విజయవాడ సెంట్రల్ నియోజకవర్గ పరిధిలోని ఐదు డివిజన్లలో ఎన్డీయే కూటమి అభ్యర్థులకు మద్దతుగా టీడీపీ యువనేత బొండా రవితేజ శుక్రవారం విస్తృత ఎన్నికల ప్రచారం నిర్వహించారు. స్థానిక నాయకులు, కార్యకర్తలతో కలిసి ఆయా ప్రాంతాల్లో పర్యటిస్తూ ప్రజలను, వ్యాపారులను కలిశారు. కూటమి అభ్యర్థులకు మద్దతు ఇవ్వాలని కోరుతూ ప్రచారం సాగించారు. 61వ డివిజన్ గిరిపురంలోని శికామణి సెంటర్ నుంచి ప్రారంభమైన ప్రచారం 84వ డివిజన్ రాధానగర్, 83వ డివిజన్ సుందరయ్యనగర్ పార్టీ కార్యాలయం, 80వ డివిజన్ వాంబే కాలనీ గాంధీబొమ్మ సెంటర్, 82వ డివిజన్ పాయకాపురం ప్రాంతాల్లో కొనసాగింది. ఆయా డివిజన్లలో కూటమి కార్పొరేటర్ అభ్యర్థులతో కలిసి రవితేజ ప్రజలను కలుసుకున్నారు. స్థానికంగా నెలకొన్న సమస్యలను అడిగి తెలుసుకున్నారు. ఈ సందర్భంగా బొండా రవితేజ మాట్లాడుతూ విజయవాడ నగర సమగ్ర అభివృద్ధి, ప్రజా సంక్షేమం, మౌలిక సదుపాయాల కల్పనకు ఎన్డీయే కూటమి ప్రభుత్వం ప్రాధాన్యం ఇస్తోందన్నారు. ముఖ్యమంత్రి చంద్రబాబు నాయకత్వంలో రాష్ట్రంలో అభివృద్ధి కార్యక్రమాలు కొనసాగుతున్నాయని పేర్కొన్నారు. నగరంలో రహదారులు, డ్రైనేజీ, పారిశుద్ధ్యం, తాగునీటి సమస్యల పరిష్కారానికి కృషి చేస్తామని తెలిపారు. ప్రభుత్వ సంక్షేమ పథకాలను ప్రతి ఇంటికీ వివరించాలని కూటమి నాయకులు, కార్యకర్తలకు సూచించారు. మేయర్ అభ్యర్థి వంగవీటి రాధాకృష్ణతోపాటు ఆయా డివిజన్ల కార్పొరేటర్ అభ్యర్థులను గెలిపించాలని ప్రజలకు విజ్ఞప్తి చేశారు. ప్రచారంలో కూటమి నాయకులు, కార్యకర్తలు, స్థానిక నేతలు పాల్గొన్నారు.