మూడు డివిజన్లలో బొండా ఉమా ఎన్నికల ప్రచారం

విజయవాడ, అక్టోబర్ 30: విజయవాడ సెంట్రల్ నియోజకవర్గ పరిధిలోని 73, 74, 68వ డివిజన్లలో ఎన్డీయే కూటమి అభ్యర్థులకు మద్దతుగా ప్రభుత్వ విప్, సెంట్రల్ ఎమ్మెల్యే బొండా ఉమామహేశ్వరరావు శుక్రవారం విస్తృత ఎన్నికల ప్రచారం నిర్వహించారు. స్థానిక నాయకులు, కార్యకర్తలతో కలిసి ఆయా డివిజన్లలో పర్యటిస్తూ ప్రజలను కలిశారు. కూటమి అభ్యర్థులను గెలిపించాలని కోరుతూ ఇంటింటి ప్రచారం చేపట్టారు. 73వ డివిజన్ న్యూ రాజరాజేశ్వరిపేట జీ ప్లస్ అపార్ట్‌మెంట్స్ బస్టాప్ వద్ద ప్రారంభమైన ప్రచారం టీడీపీ కార్యాలయం, కనకదుర్గమ్మ గుడి మీదుగా సింగ్‌నగర్ వెళ్లే మార్గంలో కొనసాగింది. అనంతరం 74వ డివిజన్‌లో గుండపు చలపతిరావు వీధి నుంచి తోటవారి వీధి మీదుగా విశాల్ మార్ట్ వరకు పర్యటించారు. 68వ డివిజన్‌లో పసుపుతోట రాములవారి గుడి నుంచి ఒకటి, రెండు రోడ్లలో ప్రచారం నిర్వహించారు. ఈ సందర్భంగా బొండా ఉమామహేశ్వరరావు మాట్లాడుతూ విజయవాడ నగర సమగ్ర అభివృద్ధికి ఎన్డీయే కూటమి కట్టుబడి ఉందన్నారు. నగరంలో రహదారులు, డ్రైనేజీ వ్యవస్థ, తాగునీటి సరఫరా, పారిశుద్ధ్య నిర్వహణ మెరుగుదలకు ప్రత్యేక ప్రాధాన్యం ఇస్తామని తెలిపారు. ముఖ్యమంత్రి చంద్రబాబు నాయకత్వంలో విజయవాడను అన్ని రంగాల్లో అభివృద్ధి చేస్తామని పేర్కొన్నారు. స్థానిక సమస్యల పరిష్కారానికి ప్రజాప్రతినిధులు నిరంతరం అందుబాటులో ఉంటారని చెప్పారు. నగర అభివృద్ధి కోసం ఎన్డీయే కూటమి కార్పొరేటర్ అభ్యర్థులతోపాటు మేయర్ అభ్యర్థి వంగవీటి రాధాకృష్ణను గెలిపించాలని ప్రజలకు విజ్ఞప్తి చేశారు. ఈ కార్యక్రమంలో కూటమి నాయకులు, కార్యకర్తలు, స్థానిక నేతలు పాల్గొన్నారు.