ప్రజాస్వామ్య భవిష్యత్తుపై నేడు చర్చావేదిక

విజయవాడ, నవంబర్ 6 : ప్రజాస్వామ్య వ్యవస్థ ఎదుర్కొంటున్న సవాళ్లు, సమకాలీన రాజకీయ పరిస్థితులపై చర్చకు విజయవాడ వేదిక కానుంది. ప్రముఖ పాత్రికేయుడు, విశాలాంధ్ర పూర్వ సంపాదకుడు చక్రవర్తుల రాఘవాచారి వర్ధంతిని పురస్కరించుకుని శనివారం ప్రత్యేక స్మారకోపన్యాసం నిర్వహించనున్నారు. చక్రవర్తుల రాఘవాచారి ట్రస్ట్ ఆధ్వర్యంలో ఎం.బి. విజ్ఞాన భవనం ప్రధాన ఆడిటోరియంలో సాయంత్రం 5.30 గంటలకు కార్యక్రమం ప్రారంభం కానుంది. ప్రజాస్వామ్య సంక్షోభంపై ప్రసంగం ఈ కార్యక్రమంలో సీపీఐ అఖిల భారత సెక్రటేరియట్ సభ్యుడు డాక్టర్ భాల్‌చంద్ర ఖండేరావ్ కాంగో ముఖ్యవక్తగా పాల్గొననున్నారు. ‘సంక్షోభంలో ప్రజాస్వామ్యం’ అంశంపై ఆయన ప్రత్యేక ఉపన్యాసం ఇవ్వనున్నారు. ప్రజాస్వామ్య విలువలు, రాజ్యాంగ పరిరక్షణ వంటి అంశాలకు ప్రాధాన్యమిస్తూ ఈ స్మారక కార్యక్రమాన్ని నిర్వహిస్తున్నారు. పాత్రికేయ రంగంలో చెరగని ముద్ర తెలుగు పాత్రికేయ రంగంలో చక్రవర్తుల రాఘవాచారికి ప్రత్యేక స్థానం ఉంది. మూడు దశాబ్దాలకు పైగా విశాలాంధ్ర సంపాదకుడిగా పనిచేసిన ఆయన ప్రజా సమస్యలను తన సంపాదకీయాల ద్వారా వెలుగులోకి తెచ్చారు. ముఖ్యంగా రైతులు, కార్మికులు, సామాజిక న్యాయం, రాజ్యాంగ విలువల పరిరక్షణకు సంబంధించిన అంశాలపై ఆయన రచనలు గుర్తింపు పొందాయి. తెలుగు, ఇంగ్లీషు, సంస్కృతం, ఉర్దూ భాషల్లో పాండిత్యం కలిగిన రాఘవాచారి పాత్రికేయ సంఘాల నాయకుడిగానూ సేవలందించారు. ఆశయాల కొనసాగింపునకు కృషి రాఘవాచారి ఆలోచనలను భావితరాలకు అందించాలనే లక్ష్యంతో ఏర్పాటైన ట్రస్ట్ ఆయన సంపాదకీయాలను నాలుగు సంపుటాలుగా ప్రచురించింది. ఏటా స్మారకోపన్యాసాల ద్వారా సమకాలీన సామాజిక, రాజకీయ అంశాలపై చర్చకు అవకాశం కల్పిస్తోంది. శనివారం జరిగే కార్యక్రమంలో పాత్రికేయులు, రచయితలు, విద్యార్థులు, ప్రజాస్వామ్య విలువల పట్ల ఆసక్తి ఉన్నవారు పాల్గొని విజయవంతం చేయాలని ట్రస్ట్ మేనేజింగ్ ట్రస్టీ జ్యోత్స్న కోరారు.