మున్సిపల్ ఎన్నికలకు పోలీసు పహారా!

విజయవాడ, అక్టోబర్ 30: ఆంధ్రప్రదేశ్‌లో నవంబర్ 1న జరగనున్న మున్సిపల్ ఎన్నికలకు రాష్ట్ర ఎన్నికల సంఘం భారీ భద్రతా ఏర్పాట్లు చేపట్టింది. ఎన్నికలు ప్రశాంతంగా, స్వేచ్ఛాయుత వాతావరణంలో జరిగేలా చర్యలు తీసుకోవాలని జిల్లా కలెక్టర్లు, ఎస్పీలను ఆదేశించింది. రాష్ట్రవ్యాప్తంగా ఎన్నికల బందోబస్తు కోసం 36,351 మంది పోలీసు సిబ్బందిని మోహరించారు. వీరిలో 32,276 మంది జిల్లా పోలీసు సిబ్బంది, 2,730 మంది ఏపీ స్పెషల్ పోలీస్ సిబ్బంది, ఇతర విభాగాలకు చెందిన 1,345 మంది ఉన్నారు. రాష్ట్రవ్యాప్తంగా 4,372 పోలింగ్ కేంద్రాలకు భద్రత కల్పిస్తున్నారు. వీటిలో 671 కేంద్రాలను అత్యంత సమస్యాత్మకమైనవిగా, మరో 1,233 కేంద్రాలను సమస్యాత్మకమైనవిగా గుర్తించారు. ఆయా కేంద్రాల వద్ద అదనపు పోలీసు బలగాలను మోహరించడంతోపాటు డ్రోన్లు, సీసీ కెమెరాలు, వీడియో రికార్డింగ్ ద్వారా నిరంతర నిఘా ఏర్పాటు చేస్తున్నారు. అవాంఛనీయ ఘటనలు జరగకుండా ప్రత్యేక స్ట్రైకింగ్ ఫోర్స్ బృందాలు, మొబైల్ పార్టీలు, ఫ్లయింగ్ స్క్వాడ్‌లను రంగంలోకి దించారు. మరోవైపు మున్సిపల్ ఎన్నికల ప్రచారానికి శుక్రవారం సాయంత్రం 5 గంటలతో తెరపడనుంది. నిర్ణీత సమయం తర్వాత బహిరంగ ప్రచారాలు నిర్వహించడం, ఎన్నికల నిబంధనలను ఉల్లంఘించడం వంటి చర్యలకు పాల్పడితే చట్టపరమైన చర్యలు తీసుకుంటామని ఎన్నికల అధికారులు హెచ్చరించారు. ప్రచార గడువు ముగిసిన తర్వాత సంబంధిత స్థానిక సంస్థల పరిధిలో ఓటర్లు కాని బయటి వ్యక్తులు వెళ్లిపోవాలని సూచించారు. నవంబర్ 1న ఉదయం 7 గంటల నుంచి సాయంత్రం 5 గంటల వరకు పోలింగ్ జరగనుంది. అవసరమైతే నవంబర్ 2న రీపోలింగ్ నిర్వహిస్తారు. నవంబర్ 3న ఉదయం 8 గంటల నుంచి ఓట్ల లెక్కింపు చేపట్టి ఫలితాలను వెల్లడించనున్నారు. ఎన్నికల నిర్వహణకు ఆటంకం కలిగించే వారిపై కఠిన చర్యలు తీసుకుంటామని ఎన్నికల సంఘం స్పష్టం చేసింది.