సోనియా ఆత్మకథ భావితరాలకు స్ఫూర్తి!
గిడుగు రుద్రరాజు చేతుల మీదుగా పుస్తకం అందుకున్న వేముల శ్రీనివాస్... సోనియా జీవిత ప్రయాణం, త్యాగాలకు అద్దం పట్టిన ఆత్మకథ... దేశ సమైక్యత కోసం గాంధీ కుటుంబం చేసిన సేవలు చిరస్మరణీయం...

విజయవాడ, నవంబర్ 15: కాంగ్రెస్ అగ్రనేత, ఏఐసీసీ మాజీ అధ్యక్షురాలు సోనియా గాంధీ రచించిన ‘బిలాంగింగ్: ఎ జర్నీ ఆఫ్ లవ్’ ఆత్మకథ భావితరాలకు స్ఫూర్తిదాయకమని ఎన్ఎస్యూఐ రాష్ట్ర కోఆర్డినేటర్ వేముల శ్రీనివాస్ పేర్కొన్నారు. కాంగ్రెస్ వర్కింగ్ కమిటీ సభ్యుడు, మాజీ ఎమ్మెల్సీ గిడుగు రుద్రరాజు చేతుల మీదుగా ఆయన ఈ పుస్తకాన్ని అందుకున్నారు. ఈ సందర్భంగా శ్రీనివాస్ మాట్లాడుతూ సోనియా గాంధీ జీవితంలో ఎదుర్కొన్న కష్టాలు, రాజకీయ ప్రస్థానంలో ఎదురైన సవాళ్లు, కుటుంబం కోసం చేసిన త్యాగాలను ఈ ఆత్మకథలో వివరించారని తెలిపారు. ఇటలీలో జన్మించిన సోనియా గాంధీ భారతీయ సంస్కృతి, సంప్రదాయాలను గౌరవిస్తూ ఈ దేశాన్ని తన మాతృభూమిగా భావించారని కొనియాడారు. రాజీవ్ గాంధీ మరణానంతరం అనేక రాజకీయ సవాళ్లను ఎదుర్కొన్నప్పటికీ ధైర్యంగా ముందుకు సాగారని పేర్కొన్నారు. ప్రధానమంత్రి పదవిని చేపట్టే అవకాశం వచ్చినా స్వీకరించకుండా త్యాగానికి ప్రతీకగా నిలిచారని అన్నారు. దేశ సమైక్యత, సమగ్రత కోసం గాంధీ కుటుంబం చేసిన సేవలు చిరస్మరణీయమని తెలిపారు. సోనియా గాంధీ వ్యక్తిగత జీవితం నుంచి రాజకీయ నాయకత్వం వరకు సాగిన ప్రయాణాన్ని ఈ పుస్తకం ప్రతిబింబిస్తుందని చెప్పారు. అటువంటి గొప్ప నాయకురాలి ఆత్మకథను అందుకోవడం ఆనందంగా ఉందని పేర్కొంటూ పుస్తకాన్ని అందజేసిన గిడుగు రుద్రరాజుకు ప్రత్యేక కృతజ్ఞతలు తెలిపారు.
