కూటమి అభ్యర్థుల గెలుపే లక్ష్యంగా పనిచేయాలి!

విజయవాడ, అక్టోబర్ 26: విజయవాడ నగరపాలక సంస్థ ఎన్నికల్లో ఎన్డీయే కూటమి అభ్యర్థుల గెలుపే లక్ష్యంగా ప్రతి కార్యకర్త కృషి చేయాలని బీజేపీ సీనియర్ నాయకులు పైలా సోమి నాయుడు పిలుపునిచ్చారు. ఎన్టీఆర్ జిల్లా బీజేపీ ఎన్నికల అబ్జర్వర్‌గా నియమితులైన సందర్భంగా భవానీపురంలోని ఎన్డీయే కార్యాలయంలో నిర్వహించిన మీడియా సమావేశంలో ఆయన మాట్లాడారు. ఈ సందర్భంగా బీజేపీ రాష్ట్ర అధికార ప్రతినిధి షేక్ బాజీ ఆయనకు నియామక పత్రాన్ని అందజేశారు. పైలా సోమి నాయుడు మాట్లాడుతూ బీజేపీ రాష్ట్ర అధ్యక్షుడు పీవీఎన్ మాధవ్, ఎమ్మెల్యే సుజనా చౌదరి ఆదేశాల మేరకు ఎన్నికల అబ్జర్వర్‌గా నియమితులు కావడం సంతోషంగా ఉందన్నారు. కూటమి పార్టీల మధ్య సమన్వయం పెంపొందిస్తూ తన బాధ్యతలను సమర్థంగా నిర్వహిస్తానని తెలిపారు. గత వైసీపీ పాలనలో అరాచకాలు తప్ప అభివృద్ధి జరగలేదని విమర్శించారు. కూటమి ప్రభుత్వ హయాంలో జరిగిన అభివృద్ధిని ప్రజల్లోకి తీసుకెళ్లాలని కార్యకర్తలకు సూచించారు. కూటమి ధర్మాన్ని పాటిస్తూ విభేదాలకు తావులేకుండా ఐక్యంగా పనిచేయాలని కోరారు. విజయవాడ మేయర్ అభ్యర్థి వంగవీటి రాధాకృష్ణతో పాటు అన్ని డివిజన్లలో కూటమి అభ్యర్థులను గెలిపించేందుకు ప్రతి ఒక్కరూ కృషి చేయాలని పిలుపునిచ్చారు. ఈ సమావేశంలో బీజేపీ రాష్ట్ర అధికార ప్రతినిధి షేక్ బాజీ, ఎన్టీఆర్ జిల్లా బీజేపీ మైనార్టీ మోర్చా ఇన్‌చార్జ్ దుర్బేసుల హుస్సేన్ తదితరులు పాల్గొన్నారు.