విజయవాడలో అర్ధరాత్రి అగ్నికీలలు.. ఏడుగురికి గాయాలు!

విజయవాడ, నవంబర్ 2: విజయవాడలో ఆదివారం అర్ధరాత్రి భారీ అగ్నిప్రమాదం సంభవించింది. చుట్టుగుంట వర్ధి ప్రాంతంలోని ఓ టింబర్ డిపోలో ఒక్కసారిగా మంటలు చెలరేగడంతో స్థానికులు భయాందోళనకు గురయ్యారు. డిపోలో కలప నిల్వలు ఉండటంతో మంటలు వేగంగా వ్యాపించి భారీగా ఎగసిపడ్డాయి. దీంతో పరిసర ప్రాంతమంతా దట్టమైన పొగ కమ్ముకుంది. సమాచారం అందుకున్న అగ్నిమాపక సిబ్బంది సంఘటనా స్థలానికి చేరుకుని మంటలను అదుపులోకి తెచ్చేందుకు ప్రయత్నించారు. ఈ క్రమంలో ఏడుగురికి గాయాలైనట్లు సమాచారం. క్షతగాత్రులను వెంటనే సమీపంలోని ఆస్పత్రికి తరలించి చికిత్స అందిస్తున్నారు. ప్రమాదం కారణంగా డిపోలోని కలప, ఇతర సామగ్రితో పాటు సమీపంలోని అపార్ట్‌మెంట్‌కు చెందిన తలుపులు, కిటికీలు, ఏసీలు కాలిపోయినట్లు తెలుస్తోంది. ప్రమాద సమయంలో అపార్ట్‌మెంట్‌లో ఉన్న సుమారు పది మందిని అగ్నిమాపక సిబ్బంది సురక్షితంగా బయటకు తీసుకొచ్చారు. దీంతో పెను ప్రమాదం తప్పినట్లయింది. మంటలు పక్క భవనాలకు వ్యాపించకుండా అగ్నిమాపక సిబ్బంది చర్యలు చేపట్టారు. అగ్నిప్రమాదానికి గల కారణాలు ఇంకా తెలియాల్సి ఉంది. నివాస ప్రాంతాలకు సమీపంలో టింబర్ డిపోల నిర్వహణ, అగ్నిమాపక భద్రతా నిబంధనల అమలుపై ఈ ఘటన ప్రశ్నలు లేవనెత్తుతోంది. ప్రమాదానికి సంబంధించి పూర్తి వివరాలు తెలియాల్సి ఉంది.