పలుకుబడితో మమ్మల్ని ఒంటరి చేశారు: మేఘన తండ్రి

కృష్ణా జిల్లా, ఆగస్టు 26: జోగి రమేష్ తనకున్న పలుకుబడిని ఉపయోగించి తమ కుటుంబాన్ని ఒంటరి చేశారని మేఘన తండ్రి అనంత కృష్ణ గౌడ్ తీవ్ర ఆరోపణలు చేశారు. తమకు జరిగిన అన్యాయంపై న్యాయం కోరినా స్పందన లభించలేదని ఆయన ఆవేదన వ్యక్తం చేశారు.

జోగి రమేష్ వ్యవహారంపై ఆయన మాట్లాడుతూ, తమను ఒంటరి చేసి ‘ఏం చేసుకుంటారో చేసుకోండి’ అన్నట్లుగా వ్యవహరించారని ఆరోపించారు. సమస్య పరిష్కారం కోసం పలువురు ముఖ్య నేతలను సంప్రదించినప్పటికీ ఫలితం లేకుండా పోయిందన్నారు.

ఈ వ్యవహారంలో సజ్జల రామకృష్ణారెడ్డి, వెల్లంపల్లి శ్రీనివాస్‌ను ఆశ్రయించినా పట్టించుకోలేదని అనంత కృష్ణ గౌడ్ పేర్కొన్నారు. తమకు న్యాయం జరుగుతుందనే ఆశతో ఎదురుచూశామని తెలిపారు.

అలాగే దేవినేని అవినాష్ నెల రోజుల కిందట కేసు పెట్టొద్దని, కూర్చొని మాట్లాడుకుందామని చెప్పారని ఆయన వెల్లడించారు. అయితే అప్పటి నుంచి ఇప్పటివరకు సమయం పొడిగిస్తూ వచ్చారని ఆరోపించారు.

తమ కుటుంబానికి జరిగిన అన్యాయంపై న్యాయం కావాలనే తాము కోరుతున్నామని అనంత కృష్ణ గౌడ్ పేర్కొన్నారు. ఈ సందర్భంగా ఆయన చేసిన ఆరోపణలు రాజకీయ వర్గాల్లో చర్చనీయాంశంగా మారాయి.