అభివృద్ధి, సంక్షేమమే మా శ్రీరామరక్ష!

విజయవాడ, అక్టోబర్ 27: విజయవాడ నగరపాలక సంస్థ ఎన్నికల నేపథ్యంలో 1వ డివిజన్‌లో ఎన్డీఏ కూటమి ఎన్నికల ప్రచారం నిర్వహించింది. మంగళవారం ఉదయం ఊర్మిళానగర్‌లోని కృష్ణ హోటల్ కట్ట వద్ద ప్రారంభమైన ప్రచారంలో ప్రభుత్వ విప్, సెంట్రల్ నియోజకవర్గ ఎమ్మెల్యే బొండా ఉమామహేశ్వరరావు పాల్గొన్నారు. కూటమి అభ్యర్థి గుడిపాటి సౌజన్యతో కలిసి ఇంటింటికీ వెళ్లి ప్రజలను కలిశారు. ఈ సందర్భంగా బొండా ఉమామహేశ్వరరావు మాట్లాడుతూ గత 27 నెలలుగా చేపట్టిన అభివృద్ధి, సంక్షేమ కార్యక్రమాలే తమకు శ్రీరామరక్ష అని పేర్కొన్నారు. ఎన్నికల సమయంలో ఇచ్చిన హామీలను అమలు చేస్తూ ప్రజల ముందుకు వెళ్తున్నామని తెలిపారు. సామాజిక పింఛన్లను రూ.3 వేల నుంచి రూ.4 వేలకు పెంచడం, తల్లికి వందనం, మహిళలకు ఉచిత బస్సు ప్రయాణం, దీపం పథకం కింద ఉచిత గ్యాస్ సిలిండర్లు, అన్న క్యాంటీన్ల ఏర్పాటు వంటి కార్యక్రమాలను అమలు చేస్తున్నట్లు వివరించారు. సింగ్‌నగర్ ప్రాంతంలో ఏళ్ల తరబడి పెండింగ్‌లో ఉన్న ఇళ్ల పట్టాల సమస్యకు ముఖ్యమంత్రి చంద్రబాబు నాయకత్వంలో పరిష్కారం చూపామని చెప్పారు. ప్రజా సమస్యల పరిష్కారానికి తమ ప్రభుత్వం ప్రాధాన్యం ఇస్తోందన్నారు. డివిజన్ అభివృద్ధి, ప్రజాసేవ లక్ష్యంగా ఎన్నికల బరిలో నిలిచిన గుడిపాటి సౌజన్యకు ఓటు వేసి భారీ మెజారిటీతో గెలిపించాలని బొండా ఉమా విజ్ఞప్తి చేశారు.