'ఆర్నబ్' తుఫాన్‌పై ఎన్టీఆర్ జిల్లా హైఅలర్ట్!

విజయవాడ, అక్టోబర్ 26: బంగాళాఖాతంలో ఏర్పడిన 'ఆర్నబ్' తుఫాన్ తీవ్రరూపం దాల్చుతున్న నేపథ్యంలో ఎన్టీఆర్ జిల్లా యంత్రాంగం పూర్తిస్థాయిలో అప్రమత్తమైంది. ఈ నెల 28న బాపట్ల–విశాఖపట్నం మధ్య యానాం సమీపంలో తుఫాన్ తీరం దాటే అవకాశం ఉన్నందున ప్రాణ, ఆస్తి నష్టం జరగకుండా కట్టుదిట్టమైన ముందస్తు చర్యలు చేపట్టినట్లు జిల్లా కలెక్టర్ డాక్టర్ జి.లక్ష్మీశ తెలిపారు. సోమవారం ముఖ్యమంత్రి చంద్రబాబు నాయుడు నిర్వహించిన వీడియో కాన్ఫరెన్స్ అనంతరం కలెక్టర్ జిల్లా అధికారులతో సమీక్ష నిర్వహించారు. భారీ వర్షాలు, తీవ్ర ఈదురుగాలుల నేపథ్యంలో ప్రజలు అత్యవసరమైతే తప్ప బయటకు రావద్దని సూచించారు. ముంపు ప్రాంతాలు, కొండచరియలు విరిగిపడే ప్రమాదమున్న ప్రాంతాల్లో నివసించే ప్రజలను పునరావాస కేంద్రాలకు తరలించాలని అధికారులను ఆదేశించారు. గర్భిణులు, బాలింతలు, వృద్ధులు, రోగులకు ముందస్తు వైద్యసేవలు అందేలా చర్యలు తీసుకోవాలన్నారు. జిల్లావ్యాప్తంగా పడవలు, పర్యాటక బోట్ల రాకపోకలతోపాటు గేమ్ పార్కుల కార్యకలాపాలను నిలిపివేయాలని ఆదేశించారు. విద్యుత్ స్తంభాలు, ట్రాన్స్‌ఫార్మర్లు, ఉధృతంగా ప్రవహించే కాలువలు, చెరువులకు దూరంగా ఉండాలని హెచ్చరించారు. చెట్లు, శిథిల భవనాలు, తాత్కాలిక షెడ్ల కింద ఆశ్రయం పొందవద్దన్నారు. రైతులు కోసిన ధాన్యాన్ని సురక్షిత ప్రాంతాలకు తరలించాలని, పశువులను సురక్షిత పాకల్లో ఉంచాలని సూచించారు. తుఫాన్ తీవ్రత దృష్ట్యా అక్టోబర్ 27, 28 తేదీల్లో జిల్లాలోని అంగన్వాడీలు, ప్రభుత్వ, ప్రైవేటు పాఠశాలలు, కళాశాలలకు సెలవులు ప్రకటించినట్లు కలెక్టర్ వెల్లడించారు. విద్యాసంస్థలు ఈ ఆదేశాలను తప్పనిసరిగా పాటించాలని స్పష్టం చేశారు. తల్లిదండ్రులు పిల్లలను ఇళ్లలోనే ఉంచాలని, విహారయాత్రలకు పంపవద్దని సూచించారు. తుఫాన్‌పై సామాజిక మాధ్యమాల్లో వదంతులు,అసత్య ప్రచారాలు వ్యాప్తి చేస్తే కఠిన చర్యలు తీసుకుంటామని హెచ్చరించారు. తుఫాన్ సమాచారం, అత్యవసర సహాయక చర్యల కోసం కలెక్టరేట్‌లో 24 గంటల కంట్రోల్ రూమ్ ఏర్పాటు చేసినట్లు తెలిపారు. అత్యవసర పరిస్థితుల్లో ప్రజలు 91549 70454 నంబర్‌ను సంప్రదించాలని కలెక్టర్ డాక్టర్ జి.లక్ష్మీశ సూచించారు.