పశ్చిమలో పెండింగ్‌ పనులు వేగంగా పూర్తి చేయాలి

విజయవాడ, అక్టోబరు 6: పశ్చిమ నియోజకవర్గంలోని డివిజన్లలో నిలిచిపోయిన, పెండింగ్‌లో ఉన్న అభివృద్ధి పనులను ప్రాధాన్యతా క్రమంలో త్వరితగతిన పూర్తి చేయాలని ఎమ్మెల్యే సుజనా చౌదరి అధికారులను ఆదేశించారు. భవానిపురంలోని ఎన్డీయే కార్యాలయంలో మంగళవారం విజయవాడ నగరపాలక సంస్థ ఇంజనీరింగ్‌ ఉన్నతాధికారులతో సమీక్ష నిర్వహించారు. కాళేశ్వరరావు మార్కెట్‌, వస్త్రలత కాంప్లెక్స్‌ పునరభివృద్ధి, కొండ ప్రాంత వాసులకు నిరంతరం స్వచ్ఛమైన, సురక్షితమైన తాగునీటి సరఫరా తదితర అంశాలపై చర్చించారు. శ్మశానవాటికలు, పార్కుల అభివృద్ధి, నదీతీర సుందరీకరణతోపాటు పెండింగ్‌లో ఉన్న వరద నీటి కాలువల నిర్మాణ పనుల పురోగతిని సమీక్షించారు. ప్రభుత్వ గ్రాంట్లకు సంబంధించిన వివరాలను అధికారులను అడిగి తెలుసుకున్నారు. సమావేశంలో నియోజకవర్గ విజన్‌ యాక్షన్‌ ప్లాన్‌ యూనిట్‌ ప్రత్యేక అధికారి ఎం.మధు, చీఫ్‌ ఇంజనీర్‌ సత్యకుమారి, సూపరింటెండింగ్‌ ఇంజనీర్‌ చంద్రశేఖర్‌, ఎగ్జిక్యూటివ్‌ ఇంజనీర్‌ శ్రీనివాస్‌, డిప్యూటీ ఇంజనీర్లు పురుషోత్తం, కరుణాకర్‌, నియోజకవర్గ ప్రత్యేక కార్యాచరణ ప్రణాళిక విభాగం సిబ్బంది పాల్గొన్నారు.