దేవరగట్టు కర్రల సంబరంలో హింస.. ఒకరు మృతి

ఆలూరు గ్రామీణ, అక్టోబర్ 22 : కర్నూలు జిల్లా హొళగుంద మండలం దేవరగట్టులో బుధవారం అర్ధరాత్రి నిర్వహించిన కర్రల సంబరంలో హింస చెలరేగింది. ఈ ఘటనలో ఆలూరుకు చెందిన పోతురాజు (28) మృతి చెందగా, 100 మందికిపైగా గాయపడినట్లు సమాచారం. తొలుత దేవరగట్టులో మాళ మల్లేశ్వరస్వామి కల్యాణోత్సవాన్ని నిర్వహించారు. అనంతరం కొండపై నుంచి ఉత్సవమూర్తులను కిందనున్న సింహాసనం కట్ట వద్దకు తీసుకొచ్చారు. ప్రత్యేక పూజల తర్వాత స్వామివార్ల బన్ని జైత్రయాత్ర ప్రారంభమైంది. ఈ సందర్భంగా వివిధ గ్రామాల ప్రజలు కర్రలు, దివిటీలతో సంబరంలో పాల్గొన్నారు. అర్ధరాత్రి దాటిన తర్వాత ఊరేగింపులో ఒక్కసారిగా హింస చెలరేగింది. కర్రలతో జరిగిన దాడుల్లో పలువురి తలలకు తీవ్ర గాయాలయ్యాయి. మొత్తం 100 మందికిపైగా గాయపడినట్లు తెలుస్తోంది. క్షతగాత్రులను ఆలూరు ప్రభుత్వ ఆస్పత్రికి తరలించి చికిత్స అందిస్తున్నారు. కర్రల దాడిలో తీవ్రంగా గాయపడిన పోతురాజు మృతి చెందినట్లు సమాచారం.