సంక్షేమమే అజెండాగా దాసరి ఉదయ్ శ్రీ ఎన్నికల ప్రచారం

పాయకాపురం, అక్టోబర్ 30: సంక్షేమ పథకాలే ప్రధాన అజెండాగా విజయవాడ సెంట్రల్ నియోజకవర్గంలోని 82వ డివిజన్‌లో ఎన్డీయే కూటమి ఎన్నికల ప్రచారం జోరుగా సాగింది. కూటమి బలపరిచిన టీడీపీ కార్పొరేటర్ అభ్యర్థి దాసరి ఉదయ్ శ్రీ శుక్రవారం డివిజన్ పరిధిలో ఇంటింటికీ తిరుగుతూ ఓటర్లను కలిశారు. స్థానిక సమస్యలను అడిగి తెలుసుకుంటూ కూటమి ప్రభుత్వం అమలు చేస్తున్న సంక్షేమ పథకాలను వివరించారు. ఈ సందర్భంగా టీడీపీ నాయకులు మాట్లాడుతూ ఎన్నికల ముందు ఇచ్చిన హామీ మేరకు ముఖ్యమంత్రి చంద్రబాబు నాయుడు ప్రభుత్వం అధికారంలోకి వచ్చిన అనంతరం వృద్ధులు, ఒంటరి మహిళల పింఛన్లను రూ.3 వేల నుంచి రూ.4 వేలకు, దివ్యాంగుల పింఛన్లను రూ.3 వేల నుంచి రూ.6 వేలకు పెంచిందన్నారు. ఇచ్చిన మాట నిలబెట్టుకునే ప్రభుత్వంగా కూటమి ప్రజల విశ్వాసాన్ని చూరగొందని పేర్కొన్నారు. పేదలు, వృద్ధులు, దివ్యాంగులకు ఆర్థిక భరోసా కల్పించడమే ప్రభుత్వ లక్ష్యమని తెలిపారు. డివిజన్ అభివృద్ధికి కృషి చేస్తానని, ప్రజలకు అందుబాటులో ఉంటూ సమస్యల పరిష్కారానికి ప్రాధాన్యత ఇస్తానని దాసరి ఉదయ్ శ్రీ పేర్కొన్నారు. కార్పొరేటర్ అభ్యర్థిగా తనకు సైకిల్ గుర్తుపై, మేయర్ అభ్యర్థి వంగవీటి రాధాకృష్ణకు గ్లాస్ గుర్తుపై ఓటు వేసి గెలిపించాలని కోరారు. కార్యక్రమంలో స్థానిక టీడీపీ నాయకులు చిన్నోడు, రాజేష్‌తో పాటు ఎన్డీయే కూటమి నాయకులు, కార్యకర్తలు పాల్గొన్నారు.