50వ డివిజన్‌లో పట్టాభిరామ్ ఎన్నికల ప్రచారం

విజయవాడ, అక్టోబర్ 24 : విజయవాడ పశ్చిమ నియోజకవర్గంలోని 50వ డివిజన్‌లో శనివారం రాత్రి కూటమి ఎన్నికల ప్రచారం నిర్వహించింది. స్వచ్ఛ ఆంధ్ర కార్పొరేషన్ చైర్మన్ కొమ్మారెడ్డి పట్టాభిరామ్ ఆధ్వర్యంలో టీడీపీ కార్పొరేటర్ అభ్యర్థి షేక్ ఆషా తరఫున ఇంటింటి ప్రచారం చేపట్టారు. స్థానిక ప్రజలను కలుసుకుని కరపత్రాలు పంపిణీ చేశారు. కూటమి బలపరిచిన జనసేన మేయర్ అభ్యర్థి వంగవీటి రాధాకృష్ణకు గాజు గ్లాసు గుర్తుపై, కార్పొరేటర్ అభ్యర్థి షేక్ ఆషాకు సైకిల్ గుర్తుపై ఓటు వేసి అత్యధిక మెజార్టీతో గెలిపించాలని పట్టాభిరామ్ కోరారు. ఈ కార్యక్రమంలో టీడీపీ మైనారిటీ సెల్ రాష్ట్ర ప్రధాన కార్యదర్శి మహమ్మద్ ఫతావుల్లాహ్‌తో పాటు కూటమి నాయకులు, కార్యకర్తలు, అభిమానులు పెద్ద సంఖ్యలో పాల్గొన్నారు.