అత్తారింటికి వెళ్తూ.. రోడ్డు ప్రమాదంలో యువకుడి దుర్మరణం!

జగ్గయ్యపేట, నవంబర్ 6 : అత్తారింటికి వెళ్తున్న ఓ యువకుడిని రోడ్డు ప్రమాదం రూపంలో మృత్యువు కబళించింది. ఎన్టీఆర్ జిల్లా జగ్గయ్యపేట మండలం అనుమంచిపల్లికి చెందిన తెల్ల గొర్ల బ్రహ్మం (28) సూర్యాపేట జిల్లాలో జరిగిన రోడ్డు ప్రమాదంలో మృతి చెందాడు. అందిన సమాచారం ప్రకారం, గురువారం అర్ధరాత్రి బ్రహ్మం చిలుకూరు మండలం కవిత కాలేజీ సమీపంలో అత్తారింటికి వెళ్తుండగా గుర్తుతెలియని వాహనం ఢీకొట్టింది. ప్రమాదంలో తీవ్ర గాయాలపాలైన ఆయన అక్కడికక్కడే ప్రాణాలు కోల్పోయాడు. మృతుడికి భార్య, ఎనిమిది నెలల కుమారుడు ఉన్నారు. బ్రహ్మం ఆకస్మిక మరణంతో కుటుంబ సభ్యులు కన్నీరుమున్నీరవుతున్నారు. కుటుంబ పెద్దను కోల్పోవడంతో భార్య, చిన్నారి భవిష్యత్తుపై ఆందోళన నెలకొంది. ఈ ఘటన అనుమంచిపల్లి గ్రామంలో విషాదాన్ని నింపింది.