చదువుతోనే ఉన్నత శిఖరాలకు!
విద్యార్థులు ఉత్తమ పౌరులుగా ఎదగాలి... క్రమశిక్షణ, పట్టుదలతో లక్ష్యాలను సాధించాలి... నున్న పోలీస్ స్టేషన్ సీఐ ఉమర్ పిలుపు...

పాయకాపురం, నవంబర్ 14: విద్యార్థులు చదువుతో పాటు క్రమశిక్షణ, మంచి నడవడికను అలవర్చుకొని సమాజానికి ఉపయోగపడే ఉత్తమ పౌరులుగా ఎదగాలని నున్న పోలీస్ స్టేషన్ సీఐ ఉమర్ సూచించారు. శనివారం స్థానిక ఎస్.జి. కిడ్స్ స్కూల్లో బాలల దినోత్సవ వేడుకలను ఘనంగా నిర్వహించారు. ఈ కార్యక్రమానికి ముఖ్య అతిథిగా హాజరైన సీఐ ఉమర్ మాట్లాడుతూ విద్యార్థి దశ నుంచే ఉన్నత లక్ష్యాలను నిర్దేశించుకొని వాటి సాధనకు కృషి చేయాలన్నారు. చదువుతోనే ఉజ్వల భవిష్యత్తుకు బాటలు వేసుకోవచ్చని పేర్కొన్నారు. విద్యార్థులు కష్టపడి చదివి తల్లిదండ్రులకు, ఉపాధ్యాయులకు, పాఠశాలకు మంచి పేరు తీసుకురావాలని ఆకాంక్షించారు. విద్యతో పాటు నైతిక విలువలు, సామాజిక బాధ్యతను పెంపొందించుకోవాలని సూచించారు. అనంతరం పాఠశాల ప్రిన్సిపాల్ లక్ష్మీ రాజ్య, పూర్ణ పవన్ దంపతులు సీఐ ఉమర్ను శాలువాతో ఘనంగా సన్మానించారు. బాలల దినోత్సవాన్ని పురస్కరించుకొని విద్యార్థులకు సీఐ ఉమర్ బహుమతులు అందజేశారు. కార్యక్రమంలో ఉపాధ్యాయులు, విద్యార్థులు పాల్గొన్నారు.

