హక్కులతో పాటు బాధ్యతలు తెలుసుకోవాలి: న్యాయమూర్తి ఎస్. వరలక్ష్మి

మచిలీపట్నం, ఆగస్టు 7 (వి10టీవీ): భారత రాజ్యాంగం ప్రతి పౌరుడికి హక్కులు కల్పించినట్లే వాటికి అనుగుణంగా బాధ్యతలను కూడా తెలుసుకుని పాటించాలని కృష్ణాజిల్లా న్యాయ సేవాధికార సంస్థ కార్యదర్శి, సీనియర్ సివిల్ జడ్జి ఎస్. వరలక్ష్మి అన్నారు.

రాష్ట్ర హైకోర్టు పిలుపు మేరకు మచిలీపట్నంలోని లేడీ యాంప్తుల్ ప్రభుత్వ బాలికల జూనియర్ కళాశాలలో మొక్కలు నాటి అనంతరం నిర్వహించిన న్యాయ విజ్ఞాన సదస్సులో ఆమె ముఖ్య అతిథిగా పాల్గొని విద్యార్థినులను ఉద్దేశించి ప్రసంగించారు.

మహిళల హక్కుల పరిరక్షణ కోసం అనేక చట్టాలు అమల్లో ఉన్నాయని, ముఖ్యంగా 18 ఏళ్లలోపు బాలబాలికలపై లైంగిక వేధింపులకు పాల్పడే నిందితులపై కఠిన చర్యలు తీసుకునేందుకు పోక్సో చట్టం తీసుకువచ్చారని వివరించారు. ఈ చట్టం కింద కేసులను జిల్లా జడ్జి స్థాయి న్యాయమూర్తి విచారిస్తారని, బాధితుల గోప్యతకు భంగం కలగకుండా ప్రత్యేక విధానంలో విచారణ జరుగుతుందని తెలిపారు.

విద్యార్థులు నైతిక విలువలతో ఎదిగి జీవిత లక్ష్యాలను నిర్దేశించుకోవాలని, సోషల్ మీడియాను బాధ్యతాయుతంగా వినియోగించాలని సూచించారు. ఇన్‌స్టాగ్రామ్, ఫేస్‌బుక్ వంటి వేదికల ద్వారా అపరిచితులతో పరిచయాలు పెంచుకోవడం ప్రమాదాలకు దారితీసే అవకాశముందని హెచ్చరించారు. అలాగే తల్లిదండ్రులు, ఉపాధ్యాయులు పిల్లలకు **'గుడ్ టచ్ – బ్యాడ్ టచ్'**పై అవగాహన కల్పించాలని సూచించారు.

వార్షిక ఆదాయం రూ.3 లక్షల లోపు ఉన్నవారు, మహిళలు, ఎస్సీ, ఎస్టీ వర్గాలకు చెందినవారు, దివ్యాంగులు, ప్రకృతి వైపరీత్యాల బాధితులకు జిల్లా న్యాయ సేవాధికార సంస్థ ద్వారా ఉచిత న్యాయ సహాయం అందిస్తామని తెలిపారు. చట్టపరమైన సందేహాల నివృత్తి కోసం 15100 టోల్‌ఫ్రీ నంబర్‌ను సంప్రదించి ఉచిత న్యాయ సలహాలు పొందవచ్చని ఆమె పేర్కొన్నారు.

ఈ కార్యక్రమంలో మచిలీపట్నం బార్ అసోసియేషన్ మాజీ అధ్యక్షుడు లంకిశెట్టి బాలాజీ, కళాశాల ప్రిన్సిపాల్ పీ. లక్ష్మి, కృష్ణా యూనివర్సిటీ ఎన్‌ఎస్‌ఎస్ కోఆర్డినేటర్ మద్దాల శ్రావణి, మచిలీపట్నం సిటీ కేబుల్ డైరెక్టర్ కొల్లు జ్ఞానసాయి, ఎన్‌ఎస్‌ఎస్ కోఆర్డినేటర్ లంకిశెట్టి హరినాథ్ బాబు, న్యాయవాది లంకిశెట్టి సాయిపాణి, మాజీ కౌన్సిలర్ వనజ, అధ్యాపకులు, విద్యార్థులు పాల్గొన్నారు.