రెమల్లె అభివృద్ధికి రూ.కోట్ల బాట

గన్నవరం, ఆగస్టు 24: అభివృద్ధిలో రాజకీయాలకు తావులేకుండా గన్నవరం నియోజకవర్గంలోని ప్రతి గ్రామాన్నీ సమానంగా అభివృద్ధి చేయడమే లక్ష్యంగా పనిచేస్తున్నామని ప్రభుత్వ విప్, గన్నవరం ఎమ్మెల్యే యార్లగడ్డ వెంకట్రావు అన్నారు. బాపులపాడు మండలం రెమల్లె గ్రామంలో సోమవారం నిర్వహించిన ‘రెండేళ్ల పాలన–అభివృద్ధి–సంక్షేమం’ కార్యక్రమంలో ఆయన పాల్గొన్నారు. కూటమి నాయకులతో కలిసి ఇంటింటికీ వెళ్లి రెండేళ్లలో ప్రభుత్వం అమలు చేసిన సంక్షేమ పథకాలు, చేపట్టిన అభివృద్ధి పనులను కరపత్రాల ద్వారా ప్రజలకు వివరించారు.

ఈ సందర్భంగా గ్రామంలో రూ.20 లక్షలతో చేపట్టనున్న డ్రైనేజీ పనులకు శంకుస్థాపన చేసిన యార్లగడ్డ, రూ.7 లక్షలతో నిర్మించిన సిమెంట్‌ రోడ్డును ప్రారంభించారు. రెమల్లెలో ఇప్పటివరకు రూ.2.91 కోట్లతో వివిధ అభివృద్ధి పనులు చేపట్టామని, మరో రూ.2.40 కోట్ల విలువైన పనులకు ప్రతిపాదనలు సిద్ధం చేసినట్లు తెలిపారు. రహదారులు, డ్రైనేజీ, తాగునీరు, విద్యుత్‌తో పాటు ఇతర మౌలిక వసతుల కల్పనకు ప్రాధాన్యం ఇస్తున్నామన్నారు.

2024 సార్వత్రిక ఎన్నికల్లో రెమల్లె నుంచి కూటమికి 195 ఓట్ల మెజారిటీ వచ్చిందని గుర్తుచేశారు. అయితే తనకు ఓట్లు ఎక్కువ వచ్చిన గ్రామాలకే అభివృద్ధిని పరిమితం చేయడం లేదని స్పష్టం చేశారు. ఎన్నికల్లో ప్రతికూల ఫలితాలు వచ్చిన గ్రామాల అభివృద్ధిపైనా ప్రత్యేక దృష్టి పెట్టామన్నారు. మడిచర్లలో ప్రతికూల ఫలితం వచ్చినప్పటికీ రూ.5.70 కోట్లతో అభివృద్ధి పనులు చేపట్టామని ఉదాహరించారు. రాజకీయ కక్ష సాధింపులకు తాను వ్యతిరేకమని, ప్రజల అవసరాలే అభివృద్ధి పనులకు ప్రామాణికమని చెప్పారు.

రెమల్లె గ్రామంలో సుమారు ఐదు వేల మంది జనాభా ఉండగా ఇప్పటికే 2,800 మందికి ఇంటింటికీ వెళ్లి ఉచిత రక్త పరీక్షలు నిర్వహించడం అభినందనీయమన్నారు. పీహెచ్‌సీ వైద్యులు, నర్సులు, సిబ్బంది ప్రజల వద్దకే వెళ్లి పరీక్షలు చేయడం ద్వారా ఆరోగ్య సమస్యలను ముందుగానే గుర్తించేందుకు అవకాశం ఉంటుందన్నారు. నియోజకవర్గవ్యాప్తంగా ఇప్పటికే 60 వేల మందికిపైగా పరీక్షలు పూర్తి చేశామని, ప్రస్తుతం ఆ సంఖ్య 70 వేలకు చేరువవుతోందని తెలిపారు.

గన్నవరం నియోజకవర్గ అభివృద్ధికి ముఖ్యమంత్రి చంద్రబాబు నాయుడు, ఉపముఖ్యమంత్రి పవన్‌ కల్యాణ్‌, మంత్రి నారా లోకేశ్‌ సహకారంతో నిధులు తీసుకొస్తున్నామని యార్లగడ్డ పేర్కొన్నారు. విమానాశ్రయం నుంచి వెస్ట్‌ బైపాస్‌కు ప్రతిపాదించిన అనుసంధాన రహదారిని గన్నవరం పట్టణం మీదుగా తీసుకువెళ్తే పట్టణ అభివృద్ధికి మరింత ప్రయోజనం కలుగుతుందని ప్రభుత్వానికి సూచించినట్లు చెప్పారు. ఈ రహదారి గన్నవరం అభివృద్ధికి **‘గేమ్‌చేంజర్‌’**గా మారుతుందన్నారు.

ఎమ్మెల్యేగా బాధ్యతలు స్వీకరించినప్పటి నుంచి ప్రజలకు అందుబాటులో ఉంటూ ప్రజాదర్బార్లు నిర్వహిస్తున్నామని తెలిపారు. నియోజకవర్గంలోని సుమారు 48 గ్రామాల్లో నిర్వహించిన ప్రజాదర్బార్ల ద్వారా 9,800కుపైగా ఫిర్యాదులు స్వీకరించినట్లు చెప్పారు. ప్రజల నుంచి వచ్చిన సమస్యలను సంబంధిత అధికారుల దృష్టికి తీసుకెళ్లి పరిష్కారానికి చర్యలు చేపడుతున్నామన్నారు.

బాపులపాడు మండలంలోని చెరువుల పరిరక్షణపైనా ప్రత్యేక దృష్టి సారిస్తున్నట్లు యార్లగడ్డ తెలిపారు. ఆక్రమణలు, పూడిక సమస్యలను పరిష్కరించి సూరంపల్లి, గోపవారిగూడెం తదితర గ్రామాల్లో చెరువులను పునరుద్ధరించేందుకు చర్యలు చేపడతామన్నారు. కొత్తపల్లి, ఆంపాపురం తదితర ప్రాంతాల్లో సుమారు 350 ఇళ్ల పట్టాల రిజిస్ట్రేషన్లను త్వరగా పూర్తి చేసేలా అధికారులకు సూచించినట్లు తెలిపారు.

గ్రామాల్లో ఉన్న పరిశ్రమల నుంచి సీఎస్‌ఆర్ నిధులను స్థానిక అభివృద్ధికి వినియోగించుకునేలా నాయకులు చొరవ చూపాలని సూచించారు. పరిశ్రమలు ఏర్పాటైన ప్రాంతాల్లో వాటి సామాజిక బాధ్యత కింద గ్రామానికి అవసరమైన అభివృద్ధి పనులు చేపట్టాలని కోరే హక్కు ప్రజలకు ఉందన్నారు.

రాజకీయ పార్టీల్లో భిన్నాభిప్రాయాలు సహజమే అయినప్పటికీ పార్టీ బలోపేతానికి నాయకులు, కార్యకర్తలు సమష్టిగా పనిచేయాలని యార్లగడ్డ పిలుపునిచ్చారు. రానున్న స్థానిక సంస్థల ఎన్నికల్లో పార్టీ విజయానికి అందరూ కలిసికట్టుగా కృషి చేయాలని కోరారు. కార్యక్రమంలో కూటమి పార్టీల నాయకులు, అధికారులు, కార్యకర్తలు, గ్రామస్తులు పెద్ద సంఖ్యలో పాల్గొన్నారు.