గిరిబాబు మరణం సినీ పరిశ్రమకు తీరని లోటు!
ప్రముఖ నటుడి మృతికి వైఎస్ జగన్ తీవ్ర సంతాపం... విలక్షణ నటనతో ప్రేక్షకుల హృదయాల్లో చెరగని ముద్ర... సినీ రంగానికి ఆయన అందించిన సేవలు చిరస్మరణీయం...

తాడేపల్లి, నవంబర్ 14: ప్రముఖ సినీనటుడు, దర్శకుడు, నిర్మాత గిరిబాబు (80) మృతిపట్ల వైఎస్సార్ కాంగ్రెస్ పార్టీ అధ్యక్షుడు, మాజీ ముఖ్యమంత్రి వైఎస్ జగన్మోహన్రెడ్డి తీవ్ర దిగ్భ్రాంతి వ్యక్తం చేశారు. గిరిబాబు మరణం తెలుగు చలనచిత్ర పరిశ్రమకు తీరని లోటని పేర్కొన్నారు. ప్రకాశం జిల్లా రావినూతల గ్రామంలో జన్మించిన గిరిబాబు నటుడిగా, దర్శకుడిగా, నిర్మాతగా సినీ పరిశ్రమలో ప్రత్యేక గుర్తింపు సంపాదించుకున్నారని జగన్ కొనియాడారు. దశాబ్దాల పాటు వందలాది చిత్రాల్లో విభిన్న పాత్రలను పోషించి తెలుగు ప్రేక్షకుల హృదయాల్లో చెరగని ముద్ర వేశారని గుర్తుచేశారు. ప్రతినాయకుడిగా, హాస్యనటుడిగా, క్యారెక్టర్ ఆర్టిస్టుగా తన విలక్షణ నటనతో ప్రేక్షకులను అలరించారని తెలిపారు. సుదీర్ఘ సినీ ప్రస్థానంలో ఎన్నో మరపురాని పాత్రలకు జీవం పోసిన గిరిబాబు సేవలు చిరస్మరణీయంగా నిలిచిపోతాయని అన్నారు. గిరిబాబు ఆత్మకు శాంతి చేకూరాలని భగవంతుడిని ప్రార్థిస్తూ, ఆయన కుటుంబ సభ్యులకు, బంధుమిత్రులకు, అభిమానులకు జగన్ తన ప్రగాఢ సానుభూతిని తెలియజేశారు.

