భువనేశ్వర్‌ చేరిన బ్యాగ్‌.. భద్రంగా చెంతకు!

విజయవాడ, అక్టోబర్‌ 8: బస్సులో మరిచిపోయిన బంగారు నగల బ్యాగ్‌ను కృష్ణలంక పోలీసులు భద్రంగా తీసుకొచ్చి బాధిత కుటుంబానికి అప్పగించారు. బెంగళూరు నుంచి విజయవాడకు బస్సులో వచ్చిన ఓ కుటుంబం ఇంటికి చేరుకున్న తర్వాత బంగారు నగలు ఉన్న చిన్న బ్యాగ్‌ కనిపించకపోవడంతో కృష్ణలంక పోలీసులను ఆశ్రయించింది. సీసీ కెమెరాల ఆధారంగా విచారణ చేపట్టిన పోలీసులు బ్యాగ్‌ బస్సులోనే ఉన్నట్లు గుర్తించారు. అప్పటికే బస్సు భువనేశ్వర్‌కు వెళ్లడంతో యాజమాన్యంతో సమన్వయం చేసి బ్యాగ్‌ను భద్రంగా విజయవాడకు తెప్పించారు. గురువారం బాధిత కుటుంబ సభ్యులకు అందజేశారు. బ్యాగ్‌ను తిరిగి తీసుకురావడంలో సహకరించిన హోంగార్డు శ్యామ్‌ను కృష్ణలంక సీఐ మురళీకృష్ణ అభినందించారు. తమ బంగారు నగలు భద్రంగా తిరిగి అందడంతో కుటుంబ సభ్యులు పోలీసులకు, హోంగార్డు శ్యామ్‌కు కృతజ్ఞతలు తెలిపారు.