తీరం దాటకముందే 'అర్నాబ్' విధ్వంసం!

భోగాపురం, అక్టోబర్ 28 : 'అర్నాబ్' తుఫాన్ తీరం దాటకముందే విజయనగరం జిల్లా భోగాపురం మండలంలోని పలు గ్రామాలను అతలాకుతలం చేసింది. మంగళవారం తెల్లవారుజాము నుంచి బుధవారం ఉదయం వరకు ఈదురుగాలులతో కూడిన భారీ వర్షాలు కురవడంతో జనజీవనం స్తంభించింది. వరద ఉద్ధృతికి రెండు ప్రధాన మార్గాల్లో కల్వర్టు, వంతెన దెబ్బతినడంతో సుమారు 20 గ్రామాలకు రాకపోకలు నిలిచిపోయాయి. పలుచోట్ల చెట్లు నేలకొరగగా, చెరువులు నిండి పొంగిపొర్లుతున్నాయి. విద్యుత్తు సరఫరాకు అంతరాయం ఏర్పడటంతో తాగునీటి కోసం ప్రజలు తీవ్ర ఇబ్బందులు ఎదుర్కొంటున్నారు. వరదలో కొట్టుకుపోయిన కల్వర్టు! ఎడతెరిపి లేకుండా కురుస్తున్న వర్షాలకు అల్లూరి సీతారామరాజు అంతర్జాతీయ విమానాశ్రయం వైపు నుంచి భారీగా వరదనీరు ప్రవహిస్తోంది. దీంతో సవరవిల్లి నుంచి కౌలవాడ వెళ్లే మార్గంలో జమ్మయ్యపేట సమీపంలోని కల్వర్టు వరద ఉద్ధృతికి కొట్టుకుపోయింది. మరోవైపు సవరవిల్లి నుంచి రావాడ మీదుగా భీమిలి మండలం అన్నవరం గ్రామానికి వెళ్లే రహదారిలో జీరుపేట సమీపంలోని వంతెన కూడా దెబ్బతింది. ఈ రెండు మార్గాల్లో రాకపోకలు పూర్తిగా నిలిచిపోవడంతో గ్రామాల మధ్య రవాణా సంబంధాలు తెగిపోయాయి. అత్యవసర పనులపై బయటకు వెళ్లాల్సిన ప్రజలు తీవ్ర ఇబ్బందులు ఎదుర్కొంటున్నారు. అంధకారంలో గ్రామాలు.. తాగునీటికీ కటకట! భారీ వర్షాలు, ఈదురుగాలుల ప్రభావంతో విద్యుత్తు సరఫరా నిలిచిపోవడంతో పలు గ్రామాలు అంధకారంలో చిక్కుకున్నాయి. విద్యుత్తు లేక తాగునీటి సరఫరాకు అంతరాయం ఏర్పడింది. మరోవైపు రహదారులు దెబ్బతినడంతో నిత్యావసర సరుకుల రవాణాపైనా ప్రభావం పడే పరిస్థితి నెలకొంది. వర్షాలు తగ్గకపోవడంతో ప్రజలు ఇళ్లకే పరిమితమయ్యారు. మరింత నష్టం వాటిల్లుతుందేమోనని ఆందోళన! బుధవారం కూడా భారీ వర్షాలు కొనసాగితే మరిన్ని రహదారులు దెబ్బతినే ప్రమాదం ఉందని స్థానికులు ఆందోళన వ్యక్తం చేస్తున్నారు. అధికారులు తక్షణమే స్పందించి వరద ప్రభావిత ప్రాంతాల్లో సహాయక చర్యలు చేపట్టాలని కోరుతున్నారు. దెబ్బతిన్న కల్వర్టు, వంతెనకు అత్యవసర మరమ్మతులు చేపట్టి రాకపోకలను పునరుద్ధరించడంతోపాటు విద్యుత్తు, తాగునీటి సరఫరాను సాధారణ స్థితికి తీసుకురావాలని విజ్ఞప్తి చేస్తున్నారు.