చనిపోతానంటూ బెదిరింపులు.. యువతి నుంచి రూ.1.38 కోట్లు!

విజయవాడ, ఆగస్టు 25: స్నాప్‌చాట్‌లో ఏర్పడిన పరిచయం ఓ యువతికి భారీ ఆర్థిక నష్టాన్ని మిగిల్చింది. డబ్బులు ఇవ్వకపోతే ఆత్మహత్య చేసుకుంటానంటూ బెదిరింపులకు పాల్పడి విజయవాడకు చెందిన యువతి నుంచి విడతల వారీగా సుమారు రూ.1.38 కోట్లు తీసుకున్నాడనే ఆరోపణలపై విజయవాడ సైబర్ క్రైమ్ పోలీసులు ఓ యువకుడిపై కేసు నమోదు చేసి దర్యాప్తు ప్రారంభించారు.

సూర్యారావుపేటకు చెందిన బాధిత యువతి సాఫ్ట్‌వేర్ ఇంజినీర్‌గా హైదరాబాద్‌లో పనిచేస్తున్నట్లు సమాచారం. ఆమెకు స్నాప్‌చాట్ ద్వారా మద్దిశెట్టి గౌతంనాయుడు అనే యువకుడు పరిచయమయ్యాడు. తాను ప్రముఖ కంపెనీలో సాఫ్ట్‌వేర్ ఉద్యోగినని, అమలాపురం సమీపంలోని అంబాజీపేట తన స్వగ్రామమని చెప్పినట్లు కథనంలో పేర్కొన్నారు. పరిచయం పెరగడంతో ఇద్దరూ తరచూ మాట్లాడుకునేవారని, ఈ ఏడాది జూన్‌లో కోయంబత్తూరుకు కూడా వెళ్లినట్లు సమాచారం.