ప్రమాద బాధితులకు తక్షణ వైద్యం అందించాలి: ఎన్టీఆర్ కలెక్టర్

విజయవాడ, ఆగస్టు 19: రోడ్డు ప్రమాదాల్లో గాయపడిన బాధితులకు తక్షణ వైద్యం అందేలా సంబంధిత శాఖల అధికారులు సమన్వయంతో చర్యలు చేపట్టాలని ఎన్టీఆర్ జిల్లా కలెక్టర్ డా. జి. లక్ష్మీశ ఆదేశించారు.

విజయవాడ కలెక్టరేట్‌లో మంగళవారం జిల్లా స్థాయి రహదారి భద్రత కమిటీ సమావేశం కలెక్టర్ అధ్యక్షతన జరిగింది. ఈ సమావేశంలో పోలీస్ కమిషనర్ ఎస్.వి. రాజశేఖర బాబు, డీటీసీ ఎం. పురేంద్రతో పాటు వివిధ శాఖల అధికారులు పాల్గొన్నారు.

జిల్లాలో రహదారి ప్రమాదాల నివారణకు తీసుకోవాల్సిన చర్యలపై సమావేశంలో విస్తృతంగా చర్చించారు. ప్రమాదాలు ఎక్కువగా జరుగుతున్న ప్రాంతాలు, బ్లాక్ స్పాట్లను గుర్తించి అక్కడ అవసరమైన భద్రతా చర్యలు చేపట్టాలని కలెక్టర్ అధికారులకు సూచించారు.

రోడ్డు ప్రమాదం జరిగిన వెంటనే బాధితులకు వైద్య సహాయం అందేలా ప్రత్యేక దృష్టి సారించాలని స్పష్టం చేశారు. పోలీసు, రవాణా, వైద్య, రహదారుల శాఖలు సమన్వయంతో పనిచేస్తే ప్రమాదాల తీవ్రతతో పాటు ప్రాణనష్టాన్ని తగ్గించవచ్చని పేర్కొన్నారు. ప్రమాదాల నివారణకు అవసరమైన చర్యలను వేగవంతం చేయాలని అధికారులను ఆదేశించారు.