దుర్గమ్మ భక్తులకు ఉచిత వైద్య సేవలు

విజయవాడ, అక్టోబర్‌ 20: దసరా శరన్నవరాత్రి ఉత్సవాల్లో అమ్మవారి దర్శనానికి వస్తున్న భక్తులకు ఉచిత వైద్య సేవలు అందిస్తున్నారు. ఆలయ ఈవో శీనా నాయక్‌ ఆదేశాల మేరకు ఇంద్రకీలాద్రిపైన, కొండ దిగువ ప్రాంతాల్లో ఏర్పాటు చేసిన వైద్య శిబిరాల్లో వైద్యులు, సిబ్బంది సేవలందిస్తున్నారు. క్యూలైన్లలో, ఇతర ప్రాంతాల్లో అలసట, అస్వస్థతకు గురైన భక్తులను వైద్య శిబిరాలకు తీసుకువచ్చి ప్రాథమిక చికిత్స అందిస్తున్నారు. ఆరోగ్య సమస్యలతో ఇబ్బంది పడుతున్నవారికి వెంటనే వైద్య సహాయం అందేలా చర్యలు తీసుకోవాలని ఈవో సిబ్బందిని ఆదేశించారు. సోమవారం మహిషాసురమర్దిని అలంకారంలో అమ్మవారిని దర్శించుకునేందుకు భక్తులు పెద్ద సంఖ్యలో తరలివచ్చారు. వీరిలో మధుమేహం, రక్తపోటు, గుండె సంబంధిత సమస్యలున్న భక్తులు కూడా ఉన్నారు. వైద్య సహాయం అవసరమైన వారికి సకాలంలో సేవలందిస్తూ ఉపశమనం కలిగించేందుకు వైద్య బృందాలు కృషి చేస్తున్నాయి. ఆలయ పరిసరాల్లోని వివిధ ప్రాంతాల్లో ఉచిత వైద్య శిబిరాలు ఏర్పాటు చేయడంపై భక్తులు సంతృప్తి వ్యక్తం చేశారు. ఆరోగ్య సమస్యలు తలెత్తినప్పుడు వైద్యులు వెంటనే స్పందించి చికిత్స అందిస్తున్నారని తెలిపారు. వైద్య సదుపాయాలు కల్పించిన ఈవో శీనా నాయక్‌, దేవస్థానం అధికారులు, వైద్యులు, వైద్య సిబ్బందిని అభినందించారు.