84వ డివిజన్‌లో లబ్బ దుర్గా ఇంటింటి ప్రచారం

పాయకాపురం, అక్టోబర్ 30: విజయవాడ సెంట్రల్ నియోజకవర్గ పరిధిలోని 84వ డివిజన్‌లో ఎన్డీఏ కూటమి బలపరిచిన టీడీపీ కార్పొరేటర్ అభ్యర్థి లబ్బ దుర్గా శుక్రవారం విస్తృతంగా ఇంటింటి ఎన్నికల ప్రచారం నిర్వహించారు. ప్రభుత్వ విప్, ఎమ్మెల్యే బొండా ఉమామహేశ్వరరావు సూచనల మేరకు కూటమి నాయకులు, కార్యకర్తలతో కలిసి డివిజన్‌లోని పలు ప్రాంతాల్లో పర్యటించారు. ఓటరు జాబితాలతో ఇంటింటికీ వెళ్లి ప్రజలను ఆప్యాయంగా పలకరిస్తూ వారి సమస్యలను అడిగి తెలుసుకున్నారు. ఈ సందర్భంగా కూటమి ప్రభుత్వం అమలు చేస్తున్న సంక్షేమ పథకాలను ఓటర్లకు వివరించారు. పేదలకు ఏడాదికి మూడు ఉచిత గ్యాస్ సిలిండర్లు, వృద్ధులకు నెలకు రూ.4 వేల పింఛను, మహిళలకు ఉచిత బస్సు ప్రయాణం, మెగా డీఎస్సీ ద్వారా ఉపాధ్యాయ ఉద్యోగాల భర్తీ వంటి కార్యక్రమాలను ప్రజలకు తెలియజేశారు. పేద విద్యార్థుల చదువులకు సహాయం, నిరుపేదలకు ఉపాధి అవకాశాలు కల్పించేందుకు టిఫిన్ బండ్ల పంపిణీ వంటి కార్యక్రమాలను ప్రస్తావించారు. డివిజన్‌లో మౌలిక సదుపాయాల అభివృద్ధి, ప్రజా సమస్యల పరిష్కారానికి ప్రాధాన్యమిస్తానని లబ్బ దుర్గా తెలిపారు. కార్పొరేటర్ అభ్యర్థిగా తనకు సైకిల్ గుర్తుపై, మేయర్ అభ్యర్థి వంగవీటి రాధాకృష్ణకు గాజు గ్లాసు గుర్తుపై ఓటు వేసి భారీ మెజారిటీతో గెలిపించాలని ఓటర్లను కోరారు. ఈ ప్రచారంలో కూటమి నాయకులు కోలా శ్రీను, లబ్బ వైకుంఠం, భీమన ఆంజనేయులు, కొరాడ రమణ, బాషా, మెహర్ తదితరులు పాల్గొన్నారు.