బొత్స బంధువుల ‘సైకిల్’ సవారీ!
వైసీపీకి గుడ్బై చెప్పిన బలగం బ్రదర్స్... తణుకులో టీడీపీ గూటికి చేరిన బలగం కుటుంబం... మున్సిపల్ ఎన్నికల ముంగిట మారుతున్న రాజకీయ సమీకరణాలు...

తణుకు, నవంబర్ 14 : మున్సిపల్ ఎన్నికలు సమీపిస్తున్న వేళ పశ్చిమగోదావరి జిల్లా తణుకులో రాజకీయ సమీకరణాలు వేగంగా మారుతున్నాయి. వైఎస్సార్సీపీ సీనియర్ నేత బొత్స సత్యనారాయణ బంధువులు తెలుగుదేశం పార్టీలో చేరడం రాజకీయ వర్గాల్లో చర్చనీయాంశంగా మారింది. తణుకు మాజీ మున్సిపల్ చైర్మన్ బలగం సీతారాం కుమారులు బలగం బాబీ, బలగం రాజ్కుమార్ తమ కుటుంబ సభ్యులతో కలిసి వైసీపీని వీడి టీడీపీ తీర్థం పుచ్చుకున్నారు. తణుకు ఎమ్మెల్యే ఆరిమిల్లి రాధాకృష్ణ తన క్యాంపు కార్యాలయంలో వారికి పార్టీ కండువాలు కప్పి సాదరంగా ఆహ్వానించారు. బలగం సీతారాం వైసీపీ నేత బొత్స సత్యనారాయణ సోదరుడు సతీష్ కుమార్కు వియ్యంకుడు కావడంతో ఈ చేరికకు రాజకీయ ప్రాధాన్యం ఏర్పడింది. గతంలో బలగం బాబీ వైసీపీ పట్టణ యువజన విభాగం అధ్యక్షుడిగా పనిచేశారు. స్థానికంగా రాజకీయ అనుభవం, పరిచయాలున్న బలగం కుటుంబం టీడీపీలో చేరడం రాబోయే మున్సిపల్ ఎన్నికల నేపథ్యంలో ఆసక్తి రేకెత్తిస్తోంది. ఈ సందర్భంగా ఎమ్మెల్యే ఆరిమిల్లి రాధాకృష్ణ మాట్లాడుతూ కూటమి ప్రభుత్వ అభివృద్ధి, సంక్షేమ పాలనపై నమ్మకంతో బలగం కుటుంబం పార్టీలో చేరడం శుభపరిణామమన్నారు. వారి చేరికతో తణుకులో టీడీపీ మరింత బలోపేతమవుతుందని ధీమా వ్యక్తం చేశారు. పార్టీ నాయకులు, కార్యకర్తలు సమష్టిగా పనిచేసి మున్సిపల్ ఎన్నికల్లో విజయమే లక్ష్యంగా ముందుకు సాగాలని పిలుపునిచ్చారు. వైసీపీకి చెందిన ప్రముఖ నేతల బంధువులు ఒక్కొక్కరుగా టీడీపీ వైపు అడుగులు వేస్తుండటం రాజకీయంగా ప్రాధాన్యం సంతరించుకుంది. బలగం కుటుంబం పార్టీ మార్పు తణుకు మున్సిపల్ ఎన్నికలపై ఎంతవరకు ప్రభావం చూపుతుందనేది ఆసక్తికరంగా మారింది.

