హోటల్ గదిలో యువకుడి అనుమానాస్పద మృతి

వీ10టీవీ విజయవాడ, ఆగస్టు 14: విజయవాడ గాంధీనగర్‌లోని అలంకార్ హోటల్‌లో 20 ఏళ్ల యువకుడు అనుమానాస్పద స్థితిలో మృతి చెందడం కలకలం రేపింది. హోటల్‌లోని రూమ్ నంబర్ 404లో కరణం సిద్ధు అనే యువకుడి మృతదేహం సీలింగ్ ఫ్యాన్‌కు వేలాడుతూ కనిపించింది. మృతదేహం కుళ్లిపోయిన స్థితిలో ఉండటంతో యువకుడు కొన్ని రోజుల క్రితమే మృతి చెంది ఉండవచ్చని భావిస్తున్నారు.

సిద్ధు ఐదు రోజుల క్రితం మరో ఇద్దరు స్నేహితులతో కలిసి హోటల్‌లో గది తీసుకున్నట్లు కుటుంబ సభ్యులు చెబుతున్నారు. గది నుంచి దుర్వాసన రావడంతో హోటల్ సిబ్బంది తలుపులు తెరిచి చూడగా సిద్ధు మృతదేహం కనిపించినట్లు సమాచారం. వెంటనే స్థానిక పోలీసులకు సమాచారం అందించారు.

ఘటనా స్థలానికి చేరుకున్న పోలీసులు రూమ్ నంబర్ 404ను తమ ఆధీనంలోకి తీసుకుని క్లూస్ టీమ్, ఫోరెన్సిక్ నిపుణులతో ఆధారాలు సేకరించారు. సిద్ధు ఆత్మహత్య చేసుకున్నాడా? లేక మరేదైనా కారణం ఉందా? అనే కోణాల్లో దర్యాప్తు చేపట్టారు. పోస్టుమార్టం నివేదిక, ఫోరెన్సిక్ ఆధారాలు, హోటల్ సీసీటీవీ దృశ్యాలు, యువకుడితో కలిసి గది తీసుకున్న వారి వివరాలు దర్యాప్తులో కీలకం కానున్నాయి.

సిద్ధు మెడికల్ షాపులో పనిచేస్తున్నట్లు కుటుంబ సభ్యులు తెలిపారు. ఘటన విషయం తెలుసుకున్న కుటుంబ సభ్యులు హోటల్ వద్దకు చేరుకుని కన్నీరుమున్నీరయ్యారు. సరైన ధ్రువీకరణ పత్రాలు లేకుండా గది ఎలా ఇచ్చారని వారు ప్రశ్నిస్తూ హోటల్ సిబ్బంది తీరుపై అనుమానాలు వ్యక్తం చేశారు.

తన కుమారుడు ఆత్మహత్య చేసుకునేంత పిరికివాడు కాదని సిద్ధు తల్లి కన్నీటిపర్యంతమయ్యారు. తన కుమారుడి మరణానికి అతనితో ఉన్న స్నేహితులే కారణమై ఉండొచ్చని ఆమె ఆరోపించారు. అయితే కుటుంబ సభ్యుల ఆరోపణలపై పోలీసుల దర్యాప్తులో వాస్తవాలు తేలాల్సి ఉంది.

యువకుడి మృతికి అసలు కారణమేంటి? అతనితో కలిసి గది తీసుకున్న ఇద్దరు స్నేహితులు ఎక్కడున్నారు? చివరిసారిగా సిద్ధును ఎవరు చూశారు? అనే అంశాలపై పోలీసులు దృష్టి సారించినట్లు సమాచారం. అన్ని కోణాల్లో సమగ్ర దర్యాప్తు జరిపి తమకు న్యాయం చేయాలని కుటుంబ సభ్యులు కోరుతున్నారు.