మచిలీపట్నంలో ముక్కలుగా మృతదేహం!

విజయవాడ, అక్టోబర్ 21: కృష్ణా జిల్లా కేంద్రం మచిలీపట్నం సమీపంలో గుర్తుతెలియని వ్యక్తి దారుణ హత్యకు గురైన ఘటన కలకలం రేపింది. బందరు మండలం వాడపాలెం గ్రామ పరిధిలో గుర్తుపట్టలేని స్థితిలో మృతదేహం లభించడం సంచలనంగా మారింది. దుండగులు మృతదేహాన్ని ముక్కలుగా నరికి మొండెాన్ని ఒక గ్రామంలో, కాళ్లు చేతులను మరో గ్రామంలో పడేసినట్లు ప్రాథమిక సమాచారం. మృతుడి ఆనవాళ్లు తెలియకుండా చేసేందుకే ఈ దారుణానికి పాల్పడ్డారా అనే కోణంలో పోలీసులు దర్యాప్తు చేపట్టారు. సమాచారం అందుకున్న బందరు రూరల్ పోలీసులు వెంటనే రంగంలోకి దిగి సంఘటనా స్థలాన్ని పరిశీలించారు. ఆర్‌పేట సీఐ ఏసుబాబు స్వయంగా ఘటనా స్థలానికి చేరుకుని వివరాలు సేకరించారు. మృతుడు ఎవరనే విషయాన్ని గుర్తించేందుకు పోలీసులు ప్రయత్నిస్తున్నారు. హత్య ఎక్కడ జరిగింది? మృతదేహాన్ని ముక్కలుగా చేసి వేర్వేరు ప్రాంతాల్లో ఎందుకు పడేశారు? ఈ ఘాతుకం వెనుక ఎవరున్నారు? అనే అంశాలపై దర్యాప్తు కొనసాగుతోంది. ఈ హత్య ఘటనను జిల్లా ఎస్పీ తీవ్రంగా పరిగణించారు. ఎస్పీ ఆదేశాల మేరకు హత్యకు గల కారణాలు, నిందితుల వివరాలను గుర్తించేందుకు ప్రత్యేక పోలీసు బృందాలు రంగంలోకి దిగాయి. మృతుడి గుర్తింపు, హత్య వెనుక అసలు కారణాలు పోలీసుల దర్యాప్తులో తేలాల్సి ఉంది.