జనసేనకు సీట్ల కేటాయింపులో అన్యాయం!.. జనసైనికుడి ఆమరణ దీక్ష!

నందిగామ, అక్టోబర్ 23: స్థానిక సంస్థల ఎన్నికల వేళ ఎన్టీఆర్ జిల్లా నందిగామ నియోజకవర్గంలో కూటమి పార్టీల మధ్య సీట్ల సర్దుబాటు వ్యవహారం చర్చనీయాంశమవుతోంది. జనసేన పార్టీకి తగిన ప్రాధాన్యం కల్పించడం లేదంటూ ఆ పార్టీ కార్యకర్త ఆమరణ నిరాహార దీక్షకు దిగడం స్థానికంగా ఆసక్తి రేపుతోంది. కంచికచర్ల మండలం పరిటాల గ్రామానికి చెందిన జనసైనికుడు పురమ కాలేశ్వరరావు శుక్రవారం ఆమరణ నిరాహార దీక్ష చేపట్టారు. ఎంపీటీసీ, జడ్పీటీసీ ఎన్నికల్లో జనసేనకు కేటాయించిన సీట్ల విషయంలో తీవ్ర అన్యాయం జరిగిందని ఆయన ఆరోపించారు. జనసేన పార్టీ ఆవిర్భావం నుంచి కార్యకర్తగా కొనసాగుతున్న కాలేశ్వరరావు ప్రస్తుతం పార్టీ స్థానిక సంస్థల ఎన్నికల సమన్వయ కమిటీ సభ్యుడిగా బాధ్యతలు నిర్వర్తిస్తున్నారు. నందిగామ నియోజకవర్గంలో కూటమి పొత్తులో భాగంగా జనసేనకు 20 శాతం సీట్లు కేటాయించాల్సి ఉండగా కేవలం రెండు స్థానాలకే పరిమితం చేశారని ఆయన ఆవేదన వ్యక్తం చేశారు. పార్టీ కోసం ఎన్నో సంవత్సరాలుగా కష్టపడుతున్న కార్యకర్తలకు, నాయకులకు తగిన అవకాశాలు కల్పించకపోవడం బాధాకరమని పేర్కొన్నారు. సీట్ల పంపకంలో జనసేన శ్రేణులకు న్యాయం జరగాలనే ఉద్దేశంతోనే తాను ఆమరణ నిరాహార దీక్ష చేపట్టినట్లు కాలేశ్వరరావు తెలిపారు. ఈ దీక్షతో నందిగామ నియోజకవర్గంలో జనసేనకు సీట్ల కేటాయింపు అంశం మరోసారి తెరపైకి వచ్చింది. కాలేశ్వరరావు డిమాండ్లపై జనసేన అధిష్ఠానం, కూటమి నాయకత్వం ఏ విధంగా స్పందిస్తుందనేది ఆసక్తికరంగా మారింది.