గన్నవరంలో కూటమి భారీ ర్యాలీ!

గన్నవరం మండల జడ్పీటీసీ ఎన్నికల నేపథ్యంలో కూటమి పార్టీల ప్రచార కార్యక్రమాలు ఊపందుకున్నాయి. తెలుగుదేశం, జనసేన, బీజేపీ కూటమి అభ్యర్థిగా బీజేపీ రాష్ట్ర కిసాన్ మోర్చా అధ్యక్షుడు కుమారస్వామి గురువారం నామినేషన్ దాఖలు చేశారు. మచిలీపట్నంలోని జిల్లా పరిషత్ కార్యాలయంలో నామినేషన్ పత్రాలు సమర్పించిన అనంతరం గన్నవరం పట్టణంలో కూటమి ఆధ్వర్యంలో భారీ ర్యాలీ నిర్వహించారు. ఈ కార్యక్రమంలో ప్రభుత్వ విప్, గన్నవరం ఎమ్మెల్యే యార్లగడ్డ వెంకట్రావు పాల్గొని కుమారస్వామికి మద్దతు తెలిపారు. ఈ సందర్భంగా యార్లగడ్డ వెంకట్రావు మాట్లాడుతూ నాలుగు దశాబ్దాలుగా బీజేపీ సిద్ధాంతాలకు కట్టుబడి పనిచేస్తున్న కుమారస్వామికి కూటమి తరఫున పోటీ చేసే అవకాశం రావడం సంతోషకరమన్నారు. బీజేపీ అంటే కుమారస్వామి, కుమారస్వామి అంటే బీజేపీ అనే స్థాయిలో ఆయన పార్టీ కోసం పనిచేశారని కొనియాడారు. 1995లో తొలిసారిగా ఎంపీటీసీ ఎన్నికల్లో పోటీ చేసిన కుమారస్వామికి దాదాపు మూడు దశాబ్దాల తర్వాత మరోసారి ప్రజల మద్దతు కోరే అవకాశం లభించిందన్నారు. రాజకీయాల్లో సీట్ల సంఖ్య కంటే ప్రజలకు సేవ చేసే నాయకులకు అవకాశాలు కల్పించడం ముఖ్యమని యార్లగడ్డ పేర్కొన్నారు. గతంలో పొత్తుల సమీకరణాల కారణంగా కుమారస్వామికి తగిన రాజకీయ అవకాశం దక్కలేదని చెప్పారు. ఈ సందర్భంగా ప్రధాని నరేంద్ర మోదీ, ముఖ్యమంత్రి చంద్రబాబునాయుడు, ఉప ముఖ్యమంత్రి పవన్ కల్యాణ్, మంత్రి నారా లోకేశ్‌తో పాటు కూటమి నాయకత్వానికి కృతజ్ఞతలు తెలిపారు. రికార్డు మెజారిటీపై యార్లగడ్డ ధీమా గన్నవరం మండల చరిత్రలో ఇప్పటివరకు ఏ జడ్పీటీసీ అభ్యర్థికీ రానంత మెజారిటీ కుమారస్వామికి వస్తుందనే నమ్మకం ఉందని యార్లగడ్డ ధీమా వ్యక్తం చేశారు. కుమారస్వామి విజయం ఖాయమని, ఎంత మెజారిటీ వస్తుందనేదే చూడాల్సి ఉందన్నారు. కృష్ణా జిల్లాలోనే అత్యధిక మెజారిటీ సాధించేలా కూటమి నాయకులు, కార్యకర్తలు సమన్వయంతో పనిచేయాలని పిలుపునిచ్చారు. జిల్లా పరిషత్‌లో రాజకీయ, సామాజిక సమీకరణాలు అనుకూలిస్తే కుమారస్వామికి వైస్ చైర్మన్ పదవి కల్పించే అంశాన్ని కూడా పరిశీలించేలా ప్రయత్నిస్తానని యార్లగడ్డ వెల్లడించారు. తెలుగుదేశం, జనసేన, బీజేపీ శ్రేణులు విభేదాలకు తావులేకుండా సమష్టిగా పనిచేయాలని సూచించారు. ర్యాలీలో మూడు పార్టీల నాయకులు, కార్యకర్తలు పెద్ద సంఖ్యలో పాల్గొన్నారు. ఎన్నికల ప్రచారంలో కూటమి అభ్యర్థి కుమారస్వామికి మద్దతుగా నాయకులు నినాదాలు చేశారు.