డీఎస్సీ అక్రమాలపై సీబీఐ విచారణ జరపాలి: వెలంపల్లి

V10 TV | విజయవాడ

రాష్ట్రంలో డీఎస్సీ నియామకాలలో జరిగినట్లు ఆరోపిస్తున్న అక్రమాలపై తక్షణమే సీబీఐ విచారణ జరిపించాలని మాజీ మంత్రి, విజయవాడ పశ్చిమ నియోజకవర్గ వైఎస్సార్‌సీపీ ఇన్‌చార్జ్ వెలంపల్లి శ్రీనివాసరావు డిమాండ్ చేశారు. వైఎస్ జగన్‌మోహన్‌రెడ్డి పిలుపు మేరకు విజయవాడలోని బాప్టిస్ట్ పాలెం వైఎస్సార్‌సీపీ కార్యాలయం వద్ద నిర్వహించిన రెండో రోజు రిలే నిరాహార దీక్షలో ఆయన పాల్గొని మాట్లాడారు.

డీఎస్సీ నియామకాలలో జరిగినట్లు ఆరోపిస్తున్న అవకతవకలకు నైతిక బాధ్యత వహిస్తూ విద్యాశాఖ మంత్రి నారా లోకేష్ రాజీనామా చేయాలని ఆయన డిమాండ్ చేశారు. అలాగే విద్యార్థులకు పెండింగ్‌లో ఉన్న ఫీజు రీయింబర్స్‌మెంట్ బకాయిలను వెంటనే విడుదల చేయాలని ప్రభుత్వాన్ని కోరారు.

రాష్ట్రంలో గంజాయి నియంత్రణలో ప్రభుత్వం విఫలమైందని, ఎన్నికల హామీల అమలుపై ప్రశ్నిస్తే కూటమి నాయకులు బెదిరింపులు, వ్యక్తిగత విమర్శలకు దిగుతున్నారని వెలంపల్లి ఆరోపించారు. విద్యార్థులు, నిరుద్యోగుల హక్కుల కోసం వైఎస్సార్‌సీపీ పోరాటం కొనసాగుతుందని స్పష్టం చేశారు.

సెంట్రల్ ఎమ్మెల్యే బోండా ఉమ తనపై చేసిన వ్యాఖ్యలను ఖండించిన వెలంపల్లి, ప్రజాస్వామ్యబద్ధంగా ఉద్యమాలు కొనసాగిస్తామని తెలిపారు. ప్రభుత్వం ఎలాంటి ఆటంకాలు సృష్టించినా విద్యార్థులు, నిరుద్యోగులకు న్యాయం జరిగే వరకు తమ పోరాటం ఆగదని అన్నారు.