వర్షపు నీటి నిల్వలకు చెక్‌.. డ్రైనేజీల ప్రక్షాళన!

విజయవాడ, అక్టోబర్ 28 : అర్నాబ్ తుఫాన్ ప్రభావంతో గత రాత్రి నుంచి కురుస్తున్న వర్షాల నేపథ్యంలో 78వ డివిజన్‌లో వర్షపు నీరు నిల్వ ఉండకుండా డ్రైనేజీల శుభ్రత పనులు చేపట్టారు. ప్రభుత్వ విప్, విజయవాడ సెంట్రల్ ఎమ్మెల్యే బోండా ఉమామహేశ్వరరావు ఆదేశాల మేరకు బుధవారం ఉదయం 7 గంటల నుంచి ఎన్డీఏ కూటమి కార్పొరేటర్ అభ్యర్థి పిరియా జగదాంబ ఆధ్వర్యంలో వడ్డెర కాలనీ, పీ అండ్ టీ కాలనీల్లో ప్రత్యేక చర్యలు చేపట్టారు. విజయవాడ నగరపాలక సంస్థ సిబ్బందితో కలిసి ఆయా ప్రాంతాల్లో పర్యటించిన పిరియా జగదాంబ డ్రైనేజీల్లో పేరుకుపోయిన చెత్తాచెదారం, నీటి ప్రవాహానికి అడ్డుగా ఉన్న వ్యర్థాలను తొలగించే పనులను పర్యవేక్షించారు. వర్షపు నీరు సజావుగా వెళ్లేలా కాలువలను శుభ్రం చేయించారు. నివాస ప్రాంతాల్లో నీరు నిలిచి ప్రజలు ఇబ్బందులు పడకుండా ముందస్తు చర్యలు తీసుకున్నారు. ఈ కార్యక్రమంలో డివిజన్ ఇన్‌చార్జి పిరియా సోమేశ్వరరావు, క్లస్టర్ ఇన్‌చార్జి సుర్విపల్లి అమర్‌నాథ్ గౌడ్, నలమాటి కామేశ్వరరావు, బూత్ ఇన్‌చార్జిలు శ్రీపాద యాదగిరి, షేక్ బాజీ, మొహమ్మద్ గౌస్, లోకేష్, పెదపూడి మాధవరావు, నాంచారయ్య, పిరియా వెంకట్, కాకి సురేష్ తదితరులు పాల్గొన్నారు.